1994年 > 目錄
榮少認老唔緊要 切勿惹及馮寶寶
文：阿吉（林冰）
馮寶寶話：「本來我已經走了（去加拿大），百鳴叫我留低幫吓手（指去老人院派利市，為《大富之家》做宣傳）。」
寶寶拍完《大富之家》，手上未有工作，阿吉問：「如果有人搵你拍戲，打去加拿大呀？」
「係呀，爾冬陞都係打去加拿大，叫李琳琳搵我嘅。」寶寶話
寶寶前日去老人院有提到兩個仔。個仔做過乜，講過乜，佢都好開心咁同我地講。但，若果有人口多，問：「你個大仔幾大？細仔又幾歲呀？」佢就會話：「咪啦，咪問佢地幾多歲啦。」
「想知之嘛。」有人咁答。「想知可以話你知，但唔好寫出來。」
「點解呀？」
「我仲要搵食嘅嘛。」寶寶咁話。
|
寶寶的年齡，其實唔係乜秘密。佢豆丁咁大個就出來拍戲，呢度半數嘅人睇住佢長大。但，寶寶是絕口不提年齡嘅，那是佢個人嘅一個小小秘密。
張國榮則啱啱相反，成日係眾人面前自稱「老嘢」。一次，佢地一班人一齊拍《大富之家》，傾吓講吓，張國榮就對寶寶話：「同佢地比，我同你都係『老嘢』。」阿吉馬上制止：「賴士里，你鍾意認老自己認好啦，寶寶唔鍾意呀。」
賴士里仲問：「寶寶，我地相差幾多歲呀？」
寶寶無出聲，阿吉答口：「大你三歲。」 |
 |
賴士里問：「係唔係呀？真係三歲？」寶寶只好點頭，真無呢個「老嘢」修。
