1983年 > 目錄
兄弟姊妹可組球隊 張國榮性格屬孤僻
文：阿吉（幕後台前）
張國榮買咗架BMW，得閒無事一個人匿埋喺架車處聽音樂，有時又鑽出來洗車，用水龍頭沖、沖、沖，好鬼落力。
阿吉覺得張國榮成日都好似心事重重，有啲憂鬱，唔多出聲，孤僻。
「孤僻？」恬妮一聽，不以為然：「成日開籠雀咁，喳喳喳，重話孤僻，頭先仲問我，去唔去呢度附近超級市場買嘢，話開車同我去。」
「你敢唔敢同佢去?」
「怕乜噃，佢咁細個。」恬妮係絕不同男人單獨相處嘅，所以，阿吉有此一問，佢話張國榮細個喎，阿吉話：「唔細啦，佢廿六歲啦。」雖然係咁話，下次見佢，照叫：「小孩子。」佢睇來實在好細個。
一次經過，又見張國榮等喺度洗車，阿吉叫一聲：「車奴！」問：「張國榮，你好似好孤僻噃。」
「係呀，細個時無人同我玩嘛。」
「你好多兄弟姊妹㗎，聽話幾乎可以組織大型足球隊。」
「係呀！不過，我對上一個大佬都大我九年。」
諗起佢日前，為宣傳佢地嘅《第一次》，講咗佢當年失身的故事，笑問：「做乜講呢啲嘢俾人知㗎？」
「係咯，啲朋友鬧我，話我唔應該講。」
「對楊羣你都算唔話得。」阿吉話：「出賣私生活。」
