1994年 > 目錄
「加減乘除」傳聞（Leslie又痕又怕痛）
文：魯童「不協和弦」專欄
江湖傳聞四則（唔係四則運算），聊博各位仁兄仁姊一看（或一笑）。
傳聞一：江湖封咪幫之中梅艷芳已經半推半就，打破許下嘅諾言而食之。大陸演唱會不在話下，仲有傳聞話即將於本地開其coming back演唱會等。真唔知道係啲娛樂商有牙力吖？抑或係萬千歌迷有影響力嘞。
傳聞二：封咪幫另一年輕人張國榮，算係最把持得住嘅一個嘞。華星將Leslie嘅舊歌《Stand Up》做咗remix送上各電臺播唔知博乜？不過，講開又講，隻歌嘅版權係華星嘅，Leslie兄都唔可以出得聲。最近又有傳聞佢同電影《金枝玉葉》唱咗首歌，滾石唱片公司好想推出，結果雙方協定呢首歌可以俾電臺播；不過，只准播七日，之後就要收番。魯童聽聞之後，覺得Leslie又痕又怕痛，都唔知搞乜。聽高佬德講，電臺都未試過咁做，唔知有乜決定呢？唉，而家做嘢乾淨夾漂亮嘅人實在大少嘞。
傳聞三：黃凱芹灌錄咗唱片即將推出。但自己同自己作咗唔少歌曲，希望可以推出；話晒佢都算係有天份嘅作曲填詞歌手。點知唱片公司話佢作啲歌太high，寧願要其他作曲人嘅作品，於是又搞到黃君面黑黑。魯童諗：呢個世界客觀啲好！有人提吓你，好過自己盲目咁跳落個井度啦。
傳聞四：陳欣健過咗新城做節目（未正式做副董事總經理嘅），每日播出啲歌曲大部分都係華星嘅產品，唔知博乜。老實講，此舉一為神功、二為弟子，一個人有兩條心都唔算多，點知有一日佢使唔使求華星吖？多個朋友少一個敵人，做到出面都係咁話嘞！
