Leslie Cheung Cyberworld

張國榮揀定三十五歲結婚

阿倫在港台的「十大中文金曲」上，宣佈從此不再參加任何領獎典禮，令好多人都覺得可惜。消息傳出之後，紛紛將矛頭指向張國榮，有說是基於他的原故，迫使阿倫作出這個決定。

「當然唔係啦！我邊有咁本事先。」張國榮嘆著氣：「人哋點講唔到我管，總之我就未至於咁巴閉。」

對他分析：「別人的意思係話你的勢越來越勁，阿倫唔甘心有朝一日俾你趕過，至會作此決定。」

歷年來活在掌聲當中，最近數次站在台上卻偶爾有噓聲傳出，阿倫自然不好受。

張國榮說：「夠有大把人噓我咯。總之阿倫的決定一定有佢自己的理由，祇有佢最清楚，而我能夠做嘅就正如阿梅（梅艷芳）話齋，就係支持。」

會不會有一日他都會效法阿倫的做法？「唔知道，真係唔知，我都未到他那個階段，點可以相提並論。」

經過今次，張國榮更加體會到娛樂圈的是非太多，姑勿論是不是發生在自己身上，分分鐘都有可能被牽涉入去，防不勝防。也是這個原故，更加堅定了他急流勇退的念頭。

「由始至終我都無打消呢個諗法，講真能夠做到依家嘅成績，我已經好心滿意足，等到我唔再唱，就可以正正式式過些平靜的生活。」

「你真係咁嚮往平靜？唔怕悶咩？」

「無壞咯，樂得自由自在。」

張國榮以阿Lam為例，對方能夠做到百毒不侵，完全不影響到私生活，教他萬分折服。

他說：「我一直都好羡慕阿Lam，不單止做人成功，仲有個美滿家庭，簡直幸福到暈。」

「你都可以擁有呢個幸福！」張國榮似笑非笑：「衰在我都未有女朋友，唔通徵友卦？」

其實張國榮年紀都不輕了，好應該為自己打算打算。

「有無同自己著急過？」

「這些事邊可以急呀，你估話要就有咩。不過我有預感卅五歲會結婚。」

「點解偏偏係卅五？又唔係卅四？卅六？」

張國榮回答：「話明預感邊有得解㗎，總之就成日『形』住咁啦。其實卅五歲結婚都係時候，我就好喜歡呢個數字，覺得幾美妙。」他這種感覺，不知別人有沒有？