Leslie Cheung Cyberworld

張國榮手口並用《色情男女》造就最偉大三級片男星

1996-08-21

張國榮拍戲有兩怕：

一怕高——因為天生畏高。

二怕火——因為火勢難控制。

拍攝《色情男女》，哥哥張國榮不單要面對火，而且還要在煞科戲當晚吊威吔跳樓。

在拍攝跳樓戲前，哥哥與記者談笑風生，期間導演爾冬陞亦不時走過來了解準備情況，又急不及待視察環境，而且還誠心上香以求拍攝順利。

「我見親人發生意外都係因為吊威吔，同埋俾火燒親。所以拍《上海灘》嗰陣，我見到華仔走得好近啲火，個心就好怯，仲同佢講：『你咁搏做乜，安全要緊嘛！』」

拍攝正式開始，哥哥縛上威吔，爾冬陞以倒拍的手法來拍攝呢場跳樓戲，危險性相對地減低。雖然是倒拍鏡頭，哥哥也表現得神似又迫真，所以不消一會，導演已經收貨。

「都幾驚㗎！環境又黑，而且都吊得幾高。」哥哥拍完呢場戲，可謂如釋重負。

情慾戲去到盡

其實哥哥拍《色情男女》，表現出色唔在講，演情慾戲就更為突出。

「我覺得拍床上戲一定要好投入，好多人就係有所顧忌，親熱緊都好似雙手懸空咁，出嚟嘅感覺好尷尬，好核突。」正如張國榮所說，情慾戲一定要去到好盡。

「如果拍呢啲鏡頭唔去到盡，不如唔好拍。話明係『色情』，無色情嘢睇不如叫《電影男女》好了。」

爾冬陞自與張國榮合作後，也不禁豎起大拇指對他讚口不絕。

「在一線男演員裏，張國榮係最大膽，最偉大嘅三級片男星。」

「坦白講，佢敢做嘅嘢，我諗都未諗過。」原來當中包括用手又用口。哥哥在戲中與舒淇的床上戲非常火辣辣，而且更會親吻舒淇的胸部。

「我相信我在銀幕上的表現，觀眾唔會有猥瑣的感覺，佢地只會覺得好真實，看得投入和目定口呆。我對呢部戲好有信心，睇片之後覺得很有美感。」

親自操刀床上戲中戲

片中哥哥飾演一名充滿理想的導演，因為兩部作品票房慘淡，最後淪為三級片導演。

「嗰場戲中戲（舒淇和徐錦江的床上戲）真係由我親自操刀，我仲剪埋片配埋樂添，不過做導演真係好辛苦，拍一組戲已經好大壓力，做演員輕鬆得多了。」爾冬陞請來張國榮拍電影，可真是有福了，皆因他做演員出色，兼做導演又落力，難怪爾冬陞頻頻說：「哥哥實在超值！」