Leslie Cheung Cyberworld

放盤單位被偷影張國榮斥沒有職業操手

1977-05-24

張國榮前晚啟程飛往澳洲繼續其世界巡迴演唱，之後尚餘日本和廣州兩站，日本一站是添食的，因為一月底哥哥在當地演唱三場，反應甚佳，在徇眾要求下再開三場，而廣州一站早前因鄧小平的逝世而臨時取消，結果順延變成最尾一站。哥哥透露，其實很多地方仲斟他做演唱，但時間難遷就，他笑說:「我唔想踩住對高踭鞋踩足成年。」

談到《春光乍洩》在康城影展上，王家衛奪得最佳導演獎，而偉仔僅以一票之差輸俾辛潘，哥哥表示，他因與大隊失去聯絡，才趕不及到康城，雖然如此哥哥也戥偉仔開心，他有跟偉仔通過電話，他說：「我叫佢唔好咁唔開心，我自己都係過來人，『爭』少少無辦法，佢仲咁後生，大把機會。」對王家衞得獎，他認為是為港人爭光。

唔會介意

有指《春》片大家將焦點似集中在偉仔身上，他可會介意？哥哥說：「無問題，亦唔介意，當日我都唔夠時間去拍，要趕返來做演唱會，啲戲分唔係喺晒我度，成套戲我得三分二到，偉仔由頭帶尾，所以佢嘅機會(指角逐男主角)一直大過我，算喇，康城張紅地氈我都踩過兩次，我仲係第一個香港演員行添，希望第日仲可以去奧斯卡。」

此外，對於他在龜背灣的家居被某雜誌偷影，哥哥坦言好嬲，還直斥該雜誌沒有職業操守，他說:「實際情形我唔知，無錯我係放盤，交託俾一間地產公司，而今次偷影有兩個可能，一係那間雜誌訛騙地產商去睇樓影嘅，第二就係兩邊串通。」

唔好老作

他可會追究？哥哥說：「唔想追究，反正我間屋企又咁靚，但咁樣偷影係極度侵犯個人私隱，佢地鍾意寫乜都得㗎啦，但佢地所寫嘅嘢都係寫錯，唔好成日老作。」哥哥呼籲所有影藝界人士和名人，日後放盤都要小心，有人睇樓時要寸步不離，他說：「好彩我無嘢唔見，我係男人無乜首飾，于莉都試過一單位被人入屋偷嘢啦！」