1982

張國榮最喜歡講笑 大庭廣眾說核突話

1982-10-03

文：阿藍 (在明星生活圈)

張國榮好鬼鍾意講笑嘅。

尤其係一講啲「核突」嘢，佢就笑騎騎。前幾日喺記者招待會見到佢，張國榮行行吓，自言自語咁話：「我去屙屎，你哋有冇人跟住。」阿藍鬧佢唔核突嘅嘢唔講。

然後叫佢自己講啲近況，佢又嗡咗句粗口出來，講完又自己笑，幾乎俾呢個悶蛋激死。

「不如講吓你哋錦繡花園間屋啦？」

「好吖！幾好住㗎！」

「聽講話你已經賣咗架平治房車，有冇啲咁嘅事？」

「呀！我已賣咗架車，換咗架寶馬。」

佢又話：「架平治好鬼呎嘥油，一加侖只係行得九咪車，而家架寶馬，一加侖行廿一咪，差幾遠㗎」「人哋啲平治房車，唔係好似你哋架咁嘥油嘅！」

「冇法啦！我嘅架係二手貨嚟，人哋用過嘅嘢，梗係冇咁錫啦，嬲起嚟就買咗。」

張國榮住喺錦繡花園間屋，係九百五十呎嘅樓，複式。

「樓上睡房、樓下客廳。」阿藍問。

張國榮點吓頭話：「我間屋好鬼平咋！」點平呀！係唔係趁人哋炒噥咗之後，你去接咗手！

「俾你估中咗，係個律師朋友介紹嘅，佢手上有呢個盤，夾平夾賤，我覺得幾盞就去買囉，裝修費成二十萬㗎，正一妹仔大過主人婆。」

「你一個人，住咁大間樓做乜噃！」

「舒服吖馬？我有一個傭人，佢同我打理，執拾得好乾淨。」

佢間屋前面嘅花園仔，重可以燒吓嘢食，得閒佢就約班朋友BBQ。

阿藍同佢傾傾吓，鍾保羅插咀，好似想同佢解釋一啲嘢，只見張國榮怒氣衝衝。

阿藍一八之下，先至知道，原來有人開演唱會，講明請張國榮、余安安做特別嘉賓，點知排名時，張國榮個名排到最後。

張國榮好「慶」咁話：「呢啲咁嘅常識都話唔知，點做嘢噃！」

鍾保羅問佢：「咁你去唔去呢？」

「去！點解唔去，不過去到只唱一隻歌，我唔介意人哋點講㗎，反正唔尊重我，我又何必唱噃！」阿藍一時之間，都唔知張國榮應唔應該咁做，有時人為咗層氣，乜都做得出嘅。

轉載自：okradee張國榮大事紀CHRONOLOGY

星島晚報