Leslie Cheung Cyberworld

張國榮嬌過紅姑

1984-10-00

文：阿吉（林冰）

鍾楚紅好耐無返邵氏。頭一日返來拍《鬼馬飛人》，見到古裝的張國榮，好奇怪地問：「乜你都喺度呀？」

「係呀，我係度拍無線的電視劇《豪門恩怨》（即《武林世家》）呀。」

鍾楚紅於是一邊化妝一邊呻：「哎，真係慘，啲地方俾人霸佔晒，哎，邵氏真係慘。」

阿吉話：「阿紅，你地班友個個都唔鍾意拍古裝，啲片場空置，無法啦，物盡其用，唯有請無線入來拍戲啦，好慘咩？」

張國榮一見鍾楚紅，即叫佢做「女人，女人」。

大概因為佢女人味迫人而來喇？阿紅則叫張國榮做「姊妹」（亦暗示佢富女人味）。仲話：「如果佢係女人，我無得撈添，重姣過我，鬼死咁姣。」

阿紅話：「睇過你的《緣份》，做得好好，姊妹呀，譚家明都話你做得好呀。」

「我做得好佢又唔搵我拍戲？家姐，見到阿譚，同佢講，整套戲我同你做，一見到就造愛，由頭做到尾，勁過《巴黎最後的探戈》，好唔好？」

阿吉話：「居然勾爛腳添。」

阿紅話：「係唔係呀，我同譚家明講叫佢搵你拍戲？」

「阿譚好鍾意鬧人，有一次幾乎同佢反面，不過，佢確又係好嘢，女人，記得同佢講搵我拍戲。」張國榮話。