Leslie Cheung Cyberworld

張國榮演唱會跳躍、鮮艷、電影感

1988-05-07

為迎接演唱會的來臨，張國榮又飛日本，又飛歐洲，前者是專誠去學舞，後者則為演唱會物色登台服裝張國榮說：「今次演唱會服裝是由自己設計，另外，還有兩位朋友幫手，我希望能令台下的觀眾在視覺上有一個新鮮感吧！」

「會奇裝異服出場嗎？」我問張國榮說。

「嘩！當然不可能，香港歌迷唔會接受，夏天來臨，配合夏天的節奏，我的演唱會，服裝顏色亦會比較鮮艷就是了。」

張國榮演唱會第二特色，亦是演唱會的主題，就是要把整個騷做到極具電影感。

「所以我演出的幾個角色，如：《倩女幽魂》的寧采臣、《英雄本色》的杰仔與及《胭脂扣》的十二少，各造型扮相，都會搬在演唱會裡。」

「嘉賓呢？」

「嗯！同林子祥、徐小鳳提過，他們說有時間的話一定捧場，所以，無話固定請邊一個，若果能夠來的，就十分老友了！」事實上，張國榮也不想固定地晚晚邀請不同嘉賓出場。歌迷的反應好直接，喜歡呶，又吹又噓，唔喜歡呶，當面柴台，「若果但係我請來的嘉賓，我唔希望佢地有如此不平等待遇。」張國榮說。

「兩年前開演唱會，與今次第三次個唱，心情感受如何？」我問張國榮。

「沒有什麼呀！習慣成自然，又唔係第一次開個唱，不過，每做一次，就當然希望一次比一次好啦！」所以，張國榮對自己演唱會，也是：盡善盡美，精益求精。

說起來，張國榮的「舞技」，在香港群星之中，已算是第一流，為什麼又要到東洋求藝呢？「自己都知所識始終有限，到日本去，就係希望學到更多、更新嘅舞蹈返嚟，唔可以話十年如一日的一成不變呀！」張國榮頗為謙虛的說。

他的演唱會，一公開售票十二場時，第一天的廣告，卻以最貴的二百元票子已經全滿了，我問張國榮，到底賣唔賣最貴飛，抑或全部被熟人「認購」了。「無辦法，全世界都話要最好位，我已經一切不管交由我的經理人負責，而且，希望演唱會加場，相信歌迷唔會向隅的。」

「張耀榮說過希望加到四十場的！」

「嘩！佢包我四十場就可以！」

「那你自己要求？』

「嗯！最緊要破了自己十二場成績，不過又唔希望去到十三場咁『梗頸』，再加多幾場就差不多了！」

張國榮的演唱會，以每場五十萬計算，若二十場的話，就有純利一千萬落袋。「去年你僅以五十萬之差做不到千萬藝員，今年開一次演唱會，不會有此遺憾吧！」

我對張國榮說。「嘩！千期唔好講此敏感性話題，稅局已經睇到實晒啦！」講到稅局，藝人大多類似張國榮的表情，都係「喊咁口」。「賺咁多錢，如何運用？」

「無呀！現在賺的都是養老金，所以絕對唔敢亂花一個錢。」張國榮笑言不介意別人說他孤寒，因為的錢唔係咁容易賺，做藝人，花無百日紅，唔紅的時候，就要用老本了。

「會唔會投資搞生意？」

「或者啦！不過有人代我管理，我唔駛過份操心！」

「只係操心賺錢就得啦？」我問張國榮。

「又唔好講得我咁市儈，我唔係賺錢機器，而家做的工作，都係我自己鍾意的，又係自己興趣，又可以賺錢，我都覺得自己很幸運的了！」

「但去年你有得過什麼獎項，今年會不會寄望有一兩個獎項到手，如兩最佳男歌手或電影金像獎？」

「不能自己話得就得，其實舊年試過提名，都已經有了進步！」有人取笑他，若拍電影的話，老是與周潤發合作，攞獎機會大大減少。

「咁又唔同，發仔好戲，他的成功係一個神話，同佢合作，自己也實在獲益良多。」張國榮說。