1996
張處長險被榮少三級呃倒
1996-12-23
文：阿吉
在紅館後台找到張國榮，佢著到好性感(準備出場)，一見阿吉馬上張開雙臂，與阿吉來個熊抱。
「我靚唔靚呀？」
「靚到暈呀。」
「人哋無睇我個騷，就話我三級，你睇吓，話我知三唔三級。」
「我知唔三級，張敏儀差啲中計唔來睇，來睇咗話你個騷好睇。」
「係呀，張敏儀同陳淑芬話好鍾意呀。」
「咁你嗰晚為什麼喊呀？」
「一個小朋友送我一架汽車（玩具)，我一時感觸……我理得佢（這個佢就係無睇佢個騷而在電台大鬧佢三級的鄭經翰)，佢千夫所指（那係指聽眾投訴啦)，我則萬千寵愛集一身。我理得佢。」
「咁咪得囉，使乜理嗰啲人講乜吖。」阿吉話。
睇完整個騷嘅感覺係：哥哥到底哥哥，自信心十足，在台上揮洒自如，鍾意點做就點做，舉手投足魅力十足(魅力當然也來自自信啦)。辣士里講嘢好惹笑嘅，每晚都有同觀眾握手，但時常被觀眾的熱情整到好痛，手都破，血都流，到握手這一環，佢大大聲話：「好啦，我又來同你哋班禽獸搏鬥啦。」話口未完，肯認禽獸的都已衝前。又譬如一出場，問：「有無人第一次睇我呀？有呀，你地有福嘞，收山七年個老鬼出來做騷嘞。」諸如此類，自我揶揄一番，很能與眾同樂。
明報
LeslieCheungCyberworld © 2025 , All Rights Reserved