2011

楊采妮：哥哥特別照顧我

 2011-09-22

（原標題：幸運是我 楊采妮）

人，打從娃娃落地出生那天起，便已經一步一步開始倒數，走向未知及已知的結局。起步一樣，終點一樣，差別，只在於手心上的那條生命線，有幾高低起伏長短迥異。楊采妮，台灣出生，香港成長，美國讀書，亭亭玉立回流香港之後，命運安排，以17歲嫩模身份，接拍了一個金飾廣告，那廣告中男主角的名字，叫郭富城。過程毋須虐打口角落水露肉，只須要販賣兩小無猜之間的蒸餾水純真愛情，就已順理入屋一夜成名，平凡女孩雙腳踏上了天梯雲端急走慢行，從此環繞身邊錦上添花的戲裡名字；李克勤、金城武、張學友、徐克、王家衞、劉華、張國榮……餘音裊繞；那是香港人鮑魚做早餐魚翅汁撈飯最景盛的年代，那是公仔箱最歌舞昇平百花盛放的年代，那是娛樂版和睇肉版最壁壘分明的年代呀！「我知，我一直都幸運得無話可說，所以我無時無刻都知足都感恩。」難怪我手寫我心的自白是「peace be with you」。除了祝福，也是寫照。

出路遇哥哥

17歲入行，拍廣告拍巨星們的MV，永遠的玉女前身原是嫩模，只是道不同，成功靠氣質贏取觀眾緣的楊采妮，脫離模特兒身份之後，夥拍的都是幕前和幕後最頂尖人物，好命到，連當事人廿年後重提舊事，除了震撼，還是震撼！

「那年，我剛剛讀完中學，傻吓傻吓入咗行，估唔到第一套戲就係拍《東邪西毒》。其實當我知道有呢個機會都好震撼，王家衞＋張叔平＋杜可風喎，已經係一個無敵組合，再加上張國榮、林青霞……對一個新人嚟講，真係會怯！」怯，人之常情；新人撞板，更加理所當然。但能夠令楊采妮記憶至深的，不是沙漠食塵或NG了幾多個take，而是哥哥張國榮當自己女一樣的無微照顧。「好多人都以為拍王家衞啲戲係冇劇本，其實我哋有，我仲要同哥哥有好多文戲有好多段對白，哥哥特別照顧我，直頭當我係小朋友去邊都帶住，主動叫我埋位同大家一齊食飯，又同我打羽毛球，就算嗰日拍嘅戲份冇哥哥份，佢都會晨早起身，踢住對拖鞋嚟化妝間幫我對戲……正因為咁，令我好快投入响沙漠拍戲呢六個月，仲令我好深刻體會到：拍電影就應該係要咁有熱誠，即使環境幾惡劣，都要唔怕辛苦，互相幫助去克服，就算去到哥哥咁嘅位置，都一樣要專業地做好準備。」

志不在攞獎

出道早，有的是無敵青春；際遇好，擁有海量觀眾緣，往後所接拍的戲種更加恨死隔籬，要不深入民心故事改編；要不中資兩岸三地大茶飯製作，連自編自導也試過了，楊氏廿年電影生涯仍是留白還未填上的那一塊拼圖，叫最佳女配/主角獎座，問心，究竟恨唔恨？「我理解呢個娛樂圈遊戲規則，一個演員成功與否，某程度，會用上獎項來評定；正如我見人攞獎，我都會戥對方開心興奮一樣。不過，唔代表我就要按大眾期望意願去行同一條路！於我，獎項只係一個bonus，你可能會覺得我咁講法好行貨，但我真係冇諗過要靠一個獎項去釐定自已得失功過。相反，我比較care每次和我合作過嘅人同事身上，過程中究竟學到幾多嘢。」

為夢想努力

同一套concept，不單只適用於今後的事業線上，還適用於生活態度上。楊更不諱言，現階段乃人生過得最舒服的時候。「舒服，係因為我意識到工作同生活之間，點樣取得平衡。我依然熱愛拍戲，但唔會再好似以前咁，一年三百六十五日都non-stop搏到盡但冇自己生活，嗰個階段已經成為過去。我想有自己嘅人生，盡量放大可以令我覺得愉悅嘅事情。例如我可以陪爹哋媽咪過生日，可以同朋友聚會，可以有時間去學感興趣嘅嘢，可以每年至少放自己一個長假，去一處從未去過嘅地方explore！」還用行動去達成夢想。「我覺得，人係應該要有夢想。有夢想，某程度係一種正能量，驅使人為咗達成自己夢想而努力。我真係唔敢去想像，一個人冇咗夢想會係點。」於是乎，為圓夢，曾經出過書，為填補未能完成大學的遺憾，早幾年拍戲不忘報讀法律文憑課程，後於UCLA遙距報讀心理學，從而發現自己原來對兒童心理學都好有興趣，又成立慈善機構，經常四出低調慈善探訪……聽落，真係好忙！

Peace be with You

同一套package，還適用於感情事上。「我一路都低調唔提感情事，因為，我唔識點講。我覺得感情事太微妙、太兩個人，兩個人嘅事，我一個人交代唔到。既然係咁，不如由day one開始就唔講。」然而，身邊好友都陸續結婚去了，羨慕嗎心急嗎？「幸福冇基準，每個人對幸福嘅定義都好唔同。於我，我唔覺得結到婚、有小朋友就等於幸福，我從來都唔係嗰種因為身邊朋友結晒婚，我就心急搵人嫁嘅人，我更加冇趕生小朋友嘅壓力，我喺呢幾年都助養咗四個小朋友。」當真，果然，上善若水，澄明如鏡？「如果，將來，真係有結婚呢一日，我希望，至少，响心態上，係覺得雙方已經ready先去做，係建基於愛，係大家都想給予對方呢一份承諾。」有愛，從來才是基礎。

壹周刊