1988

張國榮終於給激惱了

一直來，張國榮對某一類歌迷向來是十分有風度的，遇上許多不友善的辱罵或柴台，他都能做一個成功的「忍」者，很多圈中友好都對他能如此容忍而感佩服。但最近一次，在忍無可忍之下，張國榮也作出了反擊。 

那一晚的事件，有人對筆者作出不平之鳴，目擊者皆十分的肯定那班後生仔女粗野得實在太過份，非但在對張國榮作出種種毀謗性的辱罵，除叫基佬之外，有人忽然加入了粗俗無比的謾罵和難看動作，但張國榮並未有大動肝火或回罵，他只是微笑的轉身，然後很不屑的做了一個小動作回敬，也算是自己被罵後的一種發洩。後來才知道那一晚，張國榮損失慘重，他購自日本，由成龍代訂購的一輛最新客貨兩用外景車給劃花了，再加上他的隨身保母衣服亦給劃花，那些不良份子更辱罵其家人，他忍無可忍始作出輕微反擊。

見到張國榮，問他新車是否給人劃花了？

「係囉，個班友仔，根本就係響度搗亂尋開心，無聊到唔恨，佢地認為咁先至係證明擁護自己個偶像，其實，阿倫都覺得佢地無事搵事攪咋，無聊當有趣。」

「你估到係那些人喇。」

「係人都估到啦。不過，無證據講明係邊一個啫，唔係實拉佢，依家唔係捧場同柴台咁簡單，仲係刑事破壞添，拉到咪叫佢哋賠囉。」

張國榮表示自己可以忍受他們噓叫及作柴台的行為，但絕不能容忍他們的惡行，他們的所為已接近犯罪邊緣；他認為再不還顏色，這些青少年更會胡作非為擾亂治安。

「我唔怪佢哋捧自己偶像，但都唔駛踩低人哋來抬高自己偶像嘅地位，無一個做到人哋偶像嘅歌星會鍾意咁樣，因為，有所謂風水輪流轉，佢哋的歌迷唔踩人哋，咁第二時人哋歌迷亦唔會踩自己。」榮仔說得甚是有理。

「你同阿倫，有無再傾過呢件事？」

「傾都無用啦，班人唔係我哋話得聽。」

「咁講，你同阿倫咪好尷尬？」

「唔多唔少都有啦，早排都有理，但班人越來越過份，所以，阿倫同我都為免大家難堪，無必要都費事一齊上台，或者響埋同一個騷出現，嗰晚，如果唔係為咗做善事，我亦唔會同阿倫一齊做騷，你估兩班歌迷一齊鬥噓，場面好熱鬧咩，人哋當我哋無事搵事嘈咋。」 

張國榮這次的反感，亦是為了一些無辜被噓的歌星作的反應，他相信自己在歌壇有一定成績，尚且被這些人惡意胡為，一些剛起步的歌星碰到這種場面，會感到膽怯卻步，內心更會受到打擊，那是很傷的。

「現今的青少年真係令人唔明，唔通佢哋認為咁至可以引人注意，咁至算威咩？」此是一個解不開的謎，沒有誰可以解答。

金電視