1990
張國榮移民做裝修
1990-12-29
張國榮宣布退出後，「印印腳」咁過了幾個月，拍戲啲辛苦滋味已經忘記晒，直到拍《縱橫四海》，先去巴黎拍外景，返來香港又趕住在新年推出，真係趕到佢氣咳，所以，有排佢心情好唔靚。發仔兩公婆就最了解佢，所以就算只係張國榮開工，而發仔無戲，佢兩公婆不時都會拍拖去片場探班，帶啲生果、朱古力、西餅咁同張國榮解吓悶，傾吓偈，哄得佢開心到死。
|
論圈中朋友，張國榮與發仔特別好傾；兩個人一齊拍戲時，發仔常將演戲心得同張國榮研究；而佢進軍歌壇之前，亦都揚言要拜張國榮為師；只是，發仔平時嬉皮笑瞼，人人都唔知佢邊句真、邊句假，所以張國榮聞言嘅反應係：「車，但都無誠意嘅！」曾要求張國榮批評發仔歌藝，佢唔肯，只係話發仔嘅名氣勝過把聲。相信不少人都有同感，好在發仔瘀得，所以都無所謂；畀人批評完，返屋企繼續開大喉嚨大聲叫、大聲唱。
其實，張國榮都有同發仔傾過唱歌嘅問題，但認為發仔唱過搞笑歌，又唱過情歌；以他在影視圈的閱歷，見盡人生百態，如能唱些有人生哲理的歌，應該最合適不過。發仔對此也表贊同，但希望可以唱《沉默是金》一類歌，但張國榮認為他應該唱《世事如棋》一類。 |
.jpg) |
有個階段，張國榮曾考慮做發仔的唱片監製，但一來他即將離港，怕時間倉卒，二來因發仔是華納歌手，向有鍾定一為發仔作唱片監製，張國榮最後表示只能為他作曲。
講到佢離港後計劃，好多人已知佢在加拿大買了間屋，但因那是間木屋，唔好住兼唔穩陣，佢將間屋拆了再建一幢兩層石屎別墅。問佢間屋起成點，但笑笑口咁話：「加拿大啲人，做嘢無香港人咁急、咁有效率；無人會去趕工㗎！一單工程要做半年；我遲啲去到，可能要自己郁手裝修㗎！」佢話加拿大天寒地凍，為了唔想成日冷冰水，所以連地板都裝了暖氣設備。
在外國生活平淡，總不及香港緊張；泰半人因此心廣體胖，所以提醒佢：「小心變肥仔榮回來！」佢就答：「唔會，我一定會以最佳狀態見人；在外地，我懂得節制，勤力啲 keep fit，一定不會變肥仔榮！」
張國榮話佢去睇間屋完工後，就會轉去羅省讀兩年導演課程；除非佢演嘅戲得獎，或會考慮返港，否則，有排唔見，所以對啲朋友特別唔捨得，過聖誕都有送啲禮物畀老友。老友中，發仔、發嫂有禮物收，連紅姑都有。
講起佢同紅姑，真係對異性知己；紅姑幫過張國榮拍音樂特輯，而兩人在《縱橫四海》中亦有親熱鏡頭。初時紅姑因鑑於行將出閣，心情有異而曾拒絕拍攝，但被張國榮教訓了一頓，話佢應該要有演員道德，發仔在旁亦附和，紅姑反覆思量，最後至肯拍呢個鏡頭！
玉郎電視
LeslieCheungCyberworld © 2024 , All Rights Reserved