1992
鞏俐口水多似噴泉 一啖吐在面上 張國榮不捨得洗面
1992-05-28
 |
在電影廠，睇陳凱歌拍《霸王別姬》，拍到張國榮與鞏俐的對手戲，鞏俐與張國榮都同時愛上霸王張豐毅，因此鞏俐內心唔中意LESLIE，佢地拍一場法庭戲，張國榮以漢奸罪名被判監，鞏俐經過佢身邊，不但唔同情佢，還用仇恨的眼光望住LESLIE，而且吐啖口水落張國榮塊面上。
試戲時，鞏俐只係咁意噴些口水，到了正式拍時，鞏俐表情好迫真，口水大大啖噴過去，陳凱歌話鞏俐演得好，夠晒迫真。張國榮拍完呢場戲，對鞏俐說：「乜你咁多口水㗎，好似噴泉咁。」鞏俐唔好意思，即刻起身幫張國榮抹面，張國榮說：「不如我今晚唔好洗面囉！」 |
三次去北京探班，一次張國榮未入廠拍戲，一次張國榮休息五日，結果到了今次去先至正式睇佢拍戲，所以張國榮扮虞姬、扮杜麗娘、扮貴妃，我通通睇唔到，只係拿了些劇照而已。去到片場，LESLIE說：「你昨日又唔入廠，我剛剛拍完《貴妃醉酒》的戲份，只不過學了十五分鐘，陳凱歌讚我有做京劇的天分。」跟住佢又話：「你哋睇吓電視錄影機，昨日試戲及正式拍都錄好晒。」LESLIE叫個工作人員取回盒帶畀我地睇，又真係幾令人驚喜喎，身段、造手，好鬼柔軟，有板有眼，重有一個彎身盤腿的姿勢，功架十足。睇完之後，LESLIE問：「覺得點呀？」「好即係好，咁似模似樣嘅！」張國榮用功了之後有人讚，非常開心，事實上，他為了部《霸王別姬》夠晒拚搏，梗係想有好成績。
老板徐楓去探班，齊齊留意住個電視畫面，睇緊張國榮與鞏俐演戲，而陳凱歌有一個習慣，試完戲之後，就會叫演員一齊睇番自己做成點，研究一下，下次演更好一些。所以張國榮每次做完戲，就會凝神留意自己演得好唔好。張國榮剛剛坐在徐楓旁邊，徐楓講說話時，無意中隻右手往前一揮，LESLIE反應好快，一手捉住徐楓戴住隻手鈪的手話：「你要畀隻玉鈪我，如果唔係我就罷拍，」一班人在旁邊睇到，笑到哈哈大笑，LESLIE整蠱到徐楓，就覺得特別開心。
汪曼玲齋Talking
香港周刊
LeslieCheungCyberworld © 2024 , All Rights Reserved