1992
張國榮睇《霸王別姬》首映 真情流露淚如泉湧
1992-12-31
(汪曼玲齋Talking專欄)
十二月廿六日，《霸王別姬》首映。呢部戲可以話引起撲票熱潮，不知幾多人同汪汪撲飛，可惜汪汪手上只有自己一張戲票，無法滿足大家的要求。
毫無疑問，大眾撲飛，亦只不過係想先睹為快，其實呢部片，一月一號正式開畫，但係個個都想爭取時間，能夠睇早幾日就早幾日，可見影片已有一定聲勢。睇完《霸王別姬》不得不讚一句，陳凱歌係一個大師級導演，拍出一部極具格局的認真製作。張 國榮睇完戲，一直聽取朋友意見，周圍問人：「好唔好睇？」佢自己呢？入場睇十五分鐘，已經流晒眼淚。他說：「因為我知道陳凱歌點樣去拍我地童年嘅戲，嗰啲 童星真係捱打㗎，所以戲裡面睇到佢地咁，覺得啲小演員好慘，忍不住喊。」 張國榮問旁邊嘅張豐毅：「有無紙巾？」張豐毅轉去問鞏俐，鞏俐無，再問方小姐借紙巾，畀LESLIE抹眼淚。
張國榮問汪汪：「我做得好唔好？」
「唉！仲使問嘅，梗係好喇！」
「如果唔好，唔怕講，我可以接受人哋批評。」
「好即係好，無嘢批評。」汪汪說。
「成組戲，只有我一個香港人，我唔衰得㗎，其實鞏俐、張豐毅都演得咁好，我唔可以衰，一定要為香港人爭光。」
《霸王別姬》片長一百六十八分鐘，正畫都係咁嘅長度，又唔加票價，可以話係賣大包。
徐楓寄望四月康城出人頭地
睇過首映後，至今口碑唔錯。問老板徐楓：「卒之生咗個三千幾萬製作嘅仔，開唔開心？」
「當然開心。」徐楓說：「如果到明年四月，我更加開心。」
點解？因為如果呢部片入到康城，徐楓就會好有面。
香港周刊
LeslieCheungCyberworld © 2024 , All Rights Reserved