1993
張國榮身邊有個活動八寶袋
文：林冰
去《大富之家》探張國榮，在現場見到一個叫阿英的大嬸，這個英姐不離張國榮左右。佢穿一件背心，背心有幾個口袋，口袋內有各式張國榮要應用的物件。張國榮每郁一下，英姐就知佢想點。比如，佢大少爺煙癮起，英姐就立即趨到遞煙點火。佢咖啡癮起，佢就即刻去沖咖啡，林某坐喺度同辣士里傾偈，都有著數，有免費咖啡可飲。
|
一次，張國榮又望吓英姐，英姐即刻在口袋內掏煙，辣士里讚佢。「哈，阿英姐，你係醒目嘅，我郁一郁，你知我想食煙。」
辣士里同我介紹：「呢個阿英姐以前跟我嘅，我三十三場告別演唱會，佢跟足我三十三晚，佢服侍我十幾年啦，新藝城拍戲開始，做到我退出歌壇……。」略停。
辣士里話：「呢部戲（指《大富之家》）演員太多，我搵阿英姐來跟我，等佢賺啲錢過年。」最後這句我聽得分明，分明是佢照顧佢，等佢有啲收入，咁睇，辣士里都好識做人。有啲溫情。 |
 |
在英姐身上，我又睇到辣士里嘅另一面，佢同侍候過佢嘅人之間時有嬉戲。
英姐問辣士里：「依加得閑嗎？」「又簽名？」
「係呀。」「要俾錢喎。」
「幾多呀？」「五元一張啦！」
「好，五元就五元。」很爽快的樣子。
 |
英姐從佢口袋內掏出一疊張國榮的相片，叫張國榮簽，佢哋兩個煞有介事咁喺度數。
英姐問：「簽咗幾多張呀？」好似真的要俾錢張國榮似的，又簽了一疊，又問：「加埋係幾多呀？」
我出於好奇問：「你真係俾錢佢，佢真係收你錢？」
「佢點會收我錢呀？」
「你又計得好均真咁嘅？」
「我同佢玩之嘛。」一老一少，時有如此這般的嬉戲。 |
英姐同我講辣士里四年前告別演唱會最後一場，佢話：「嗰晚，場面好動人，天好凍，我攞住件大褸，企喺度等佢落台。嗰個周潤發喺後台同我玩，死捉住我唔放，我都未來得及，辣士里衝落台，一支箭咁標，含住一泡眼淚，上咗架車，走咗。」我話：「我有睇嗰晚影帶，辣士里好心傷，唔捨得……。」辣士里話：「梗係心傷啦，每唱一隻少一隻……。唔再唱啦嘛！稍停，辣士里話：「果晚錄影帶，我一次都未睇過。」梗係啦，容乜易又一殼眼淚喎。
香港雜誌
LeslieCheungCyberworld © 2024 , All Rights Reserved