1994

張國榮麻雀檯前滿頭汗 梁家輝練功未成手先傷

凌晨一時，尖東某酒樓傳來打牌喧鬧聲。瘋狂雀迷如我，當下暗自雀躍：以後打通宵鵲局，有著落啦……。

帶足賭本，四名大漢殺人酒樓，竟然發現超過四十名大漢，又打燈又攝影，不遠處更傳來呂奇式的招牌笑聲——梁家輝先生，還有雀林高手張國榮。這是一套罕有的勵志片《錦繡前程》。但沒有採用羅記早年大作《前程錦繡》作主題曲，主題也不是勸人唔好打通宵麻將，實際劇情圍繞一間老人院（唔係軟硬那間）被地產公司迫遷，幾位好朋友合力抗衡的偉大故事。

打牌學做人有道理

拍打麻將戲，心想酷愛此道的Leslie一定輕輕鬆鬆，寓工作於娛樂，易過食菜。誰知，現場卻見他滿頭大汗、神情緊張——揸住手大牌乎？非也。

「今次我要說一大段對白，劇本才剛剛收到，所以分外緊張。而且，我與黃子華、王敏德未合作過，希望大家可work到，自然要全神貫注，不容有錯。」Leslie出名工作態度認真，連袁詠儀亦英名盡喪於其股掌之中，今回又要臨場爆肚咁滯，他會感到不快嗎？「呢啲戲我都無所謂嘅，但如果文藝片、劇情片就麻煩啦。」

講開打牌，素聞Leslie天生手震，令雀友們經常扮醒目地以為他手執大牌，到頭來原來一番都無。提到這裡，他哈哈笑：「係遺傳，不過而家無啦。」但講到打麻將呢家嘢，Leslie可非常認真了。「打麻將就好似做人一樣，一定盡量做好佢。所以，我打牌好嚴謹，輸贏都唔會太出聲。」Leslie打牌學做人的論調，固然發人深省，但如果有人酷愛食雞糊，咁即係話佢日後都會做……。

毫無疑問，Leslie的一生光輝燦爛，麻將檯上自然亦輸少蠃多。但至於如今城中最熱門話題的世界盃，Leslie有沒有心水猜中冠軍？「我希望巴西會贏，但最衰今屆阿根廷又似乎踢得幾好，一時間難以判斷。」事實上，Leslie又確是超級球迷。一有空檔時間，立即飛奔入電視房嘆波。難怪有影圈中人謂：這一個月來，夜班通告忽然大受歡迎，蓋有一大班人噴噴口水花，傾傾波經，至高享受也。  

紅星齊論世界盃

與Leslie並肩作戰於公仔箱之綠茵場上的，當然還有一個梁家輝。「以前比較狂熱一些，但現在很多球星也不太熟悉，自然不會如以往那般追來看。」雖然狂熱不再，但對今年形勢，家輝仍然說得興奮過阿權林尚義：「今年，我主要睇係歐洲與南美陣營對打，大家部係全攻型，快上快落，一定好睇」。與Leslie一樣，他將牙骹押在公眾人熱門——巴西。「有感情嘛，況且哥倫比亞又出局，阿限廷亦唔係想像中咁好……。」

講完波，不如講吓拍戲趣事啦！「趣事就無，痛苦就有。」得咁慘呀？「我打鼓打到手指腫呀！」點解家輝無端端要打鼓呢？原來他在片中飾演一個中樂團的「兜踎」鼓手，所以要勤練鼓技，以求似模似樣。可惜，有點出師未捷手先痛的意味。

「我一早知打鼓不是太易，但我會有這方面的天份，卻無這方面的毅力。公司已搵專人教我，我以為自己一定很易上手，點知打到隻手又腫又痛，最慘重要未學識，難度與痛苦程度太高了。」

當家揮拼命苦練的時候，隔鄰屋外街坊們，耳朵的痛苦程度，想必不下於家輝。他抗議：「我吼住無人先打㗎，一定嘈唔到人嘅！」家輝廣結善緣，望普天神佛多多保佑，阿門。

香港雜誌