Leslie Cheung Cyberworld

1996

張國榮當街同記者炒大鑊

1996-06-25

藝人和記者，關係真微妙，有時拍晒賻頭稱兄道弟，有時又鬧到狗血淋頭，這日竟然在尖沙咀街頭，目睹張國榮同記者衝突，簡直係群情洶湧。

影我地嗌交？打！

唔好影相呀，仲影！唔係記者唔好影相，只係練習一下跟住嘅對白。

起初Leslie同舒淇發生罵戰，一群記者見狀就立即湧上，鎂光燈閃不停，跟著是電視台的外景隊殺人戰陣，各人互相有衝撞，情況緊張。「Cut！Cut咗喇！」然後就一輪哨子聲。原來係導演知道佢哋拍得太投入，會失控，惟有以哨子聲提醒各位快啲「出」戲，所以拍到咁上下就會聽到「BB」聲。

導演爾冬陞都算藝高人膽大，喺正太空館出面條街取景，又適逢中午時分，演員、工作人員、途人、遊客等將整條街道擠得水涉不通，幸好處理得宜，並未做成任何混亂。

想我教唱歌？ 唔得！

「舒淇做戲好叻，好有感情，佢絕對可以脫離三級行列，唔須要再拍番以前嘅戲。」聽榮少這番話，可知他對舒淇實在寄予厚望。在拍攝當中，Leslie不時教舒淇如何入戲同講對白，認真無微不至，難怪她亦時常盛讚榮少：「佢真係好靚仔呀！又成日教我做戲啦，又夠細心……唔知幾時教我唱歌呢？」點知榮少聽到最尾嗰句立時大有反應：「唔得！妳唔係唱歌嘅材料，俾心機拍戲啦。」

「點解喎，你又未聽過人唱歌……。」見舒淇個表情滿不是味兒，都唔知好嬲定好笑。

導演？我識導又識演

呢場Leslie同記者機嘅爭執戲，本來拍咗兩次導演就話搞掂，但Leslie睇完重播後作出強烈反對：「唔係咁好喎，不如再嚟多次啦，Okay！」

哥哥唔知係咪在《金枝2》裡頭做過真導演，今次《色情男女》又係扮導演，所以對拍攝中的細節更加執著，務求至正效果先收貨。「做導演？出年年尾啦。但係又可能會去拍西片，仍然未定；個導演好勁㗎，不過其他嘢落實先再講啦，連劇本都未睇，所以暫時都係——秘密。」

Leslie對佢拍嘅每一部份都好謹慎，拍完即時看效果如何，加埋小寶咁緊張，令其他工作人員士氣甚高。

一向都有外國勁量級導演向佢招手，拍《情人》的導演就曾對Leslie的演技垂青，可惜最後仍談不上什麼合作，相信是Leslie追求完美，誓要搵到一個最適合的角色才拍，以免令大家失望吧！

1996

張國榮當街同記者炒大鑊

東Touch