Leslie Cheung Cyberworld

張國榮林青霞互以哥哥姐姐稱呼

晚上八點，入新界去探《白髮魔女傳》班。

這一晚係林青霞最後一晚，拍到凌晨兩點，佢可以收工嘞。兩點以後則集中拍張國榮。張國榮八點幾已來報到。青霞問：「咦？哥哥，兩點至拍到你，你咁早來做乜呀？」辣斯里話：「姐姐，我來睇吓你嘛。」

青霞話：「哥哥你一定係知阿吉會來，來睇阿吉嘅，哥哥。」事實上，當然唔係，賴士里唔知阿吉會到，阿吉亦無咁大面子。

賴士里對住青霞，姐姐、姐姐咁叫，青霞對住賴士里則哥哥、哥哥咁叫。一個女性工作人員打趣話：「姐姐叫哥哥做哥哥，哥哥叫姐姐做姐姐。」令到阿吉噗嗤一聲笑出來。

《白髮魔女傳》這堂景搭在山上，屋離地面有四五十呎，樓底好高。大門洞開，所以非常風涼水冷。賴士里無事做，吃完晚飯，就會到現場來與大家傾偈。

于仁泰話：「賴士里好鍾意拍夜班。總之吃過晚飯至開工，佢就無所謂。佢最怕係吃飯盒。」

林青霞由下午拍到凌晨，一個手抽內裝滿了各色食物，鴨舌、豆腐乾、漢堡包、車厘子、番茄，簡直是應有盡有。有人話：「青霞，你真好胃口，吃極唔肥。」青霞話：「唔係呀，我驚想吃時無時間，無心情吃。有得吃，想吃時快D吃咋。」

文：阿吉 (林冰)