1996

張國榮恨簽支票

 1996-06-20

文：林冰

與張國榮從商埸走出來，被一堆歌迷圍住，有人遞上舊照片叫他簽名，有人要求合照，甚至有人遞給辣士里一些喉搪，辣士里把喉糖拿在手裡，一邊走一邊忙於應付簽名。一個朋友說：「難怪那些大明星不願出街，煩都煩死。」然後問辣士里：「你煩不煩呀？」

辣士里說：「唔煩，到走出來無人理就慘。」 

又見一個fan屎遞上一盒喉糖：「辣士里，畀你，知你戒咗煙。」辣士里又接過喉糖，後來還打開它，請我吃，自己也放一顆在口裡。那天，辣士里心情特別好，走到大門口，他還扮護衛員，當我是「天王巨星」，推開門，推開人群，口中嚷嚷：「冰姐來了，讓開讓開。」討我開心。

上了辣士里的車，他對我說：「我同你去我度坐吖。」當時的第一個反應是去他家，待他叫司機去「為你鍾情」，我才知搞錯。

「冰姐呀，我而家幾好呀，嗰兩間成日『砌』我的刊物，『砌』我唔入，而家咪又係講我好話。」

「係咩？而家開始讚你咩，可能編輯方針有變囉。」

「好在我命硬咋，佢哋舊年由八月一路追打我到十二月，兩間刊物好似聯手咁，你『砌』完我『砌』，唔係命大，我已經死㗎啦。」

「所以，有時唔使將一啲嘢睇得太大。」

嗰啲新聞牽涉到朋友，會害死埋人哋㗎。」辣士里話。

「冰姐呀，『為你鍾情』啲嘢唔錯㗎，你吃乜，其實我原先的意念唔係開一間咁嘅餐廳。」

「你想開乜嘢餐廳？」

「素食，唔殺生嘅。」

「拍檔唔同意呀？可能租金貴，做素食未必翻到本。」

「我會開一間素食店，做住先啦，學到點樣做飲食先講，聽講『友和』出糧你簽支票喎。」

「簽支票有乜了不起噃，好閑啫。」

「但，『為你鍾情』我都未有支票簽。」

聽佢講來好似好羨慕我簽支票，真係畀佢笑死。佢大明星每拍一日戲，計埋有成二十多三十萬，走上紅館每晚更是百萬酬勞，竟羨慕我簽這小小支票，我笑對佢話：「咁濕碎嘅嘢佢地唔敢叫你做呀，辣士里。」

喺「為你鍾情」見到一啲日本fan屎，辣士里話：「我嘅電影喺日本都受歡迎，整整吓啲日本人都識得『為你鍾情』囉。」

「咁咪好囉，相得益彰。」

香港電視