1996
《金枝玉葉2》延續美的神話 鏡頭以外的漏網新聞
 |
五十年代的西片《金枝玉葉》令當代觀眾為之著迷讚嘆，富麗堂皇的場面加上靚人靚衫的襯托，配合浪漫熱鬧的愛情故事，成為經典名片之一，真箇是百看不厭。由嘉禾與UF0聯合出品、嘉樂發行的港產巨製《金枝玉葉2》，承接兩年半前首集掀起的金裝靚片熱潮，定於今年八月上旬會眾，話明金裝戲碼，又不妨逐樣「晒」！
粒粒都係耀目之星
先說卡士，保留上集的皇牌配搭包括：張國榮、袁詠儀、曾志偉、陳小春之外，今集還加入個梅艷芳，淨卡士薪酬已不菲。
重本製作都要超支
製作費呢？你慌平得去邊？粗略計算是不連演員酬金亦要千五萬包底，臨煞科前仲有少許超支。再講幕後陣容，計有導演陳可辛、美術總監奚仲文、編劇阮世生、攝影指導陳俊傑、佈景指導劉敏雄、音樂設計許願、服裝指導吳里璐……咁嘅班底，你有無信心捧場？
三角戀情點收科？
在帶讀者進入華麗佈景裝置的西貢濠涌成豐片廠前，講吓戲經先，上集講到顧家明（張國榮）與反串男性的樂壇新秀林子穎（袁詠）戀愛，玫瑰（劉嘉玲）離開家明讓他成其好事。 |
 |
下集發展，家明與子穎愛得好隱閉，結為一對性別模糊的愛侶，子穎事業突飛猛進，更奪得「最受歡迎男歌星獎」，但正因如此，「他」真正的性別更難道明。為豐富劇情，今集安排百變巨星方艷梅（梅艷芳）重出江湖再戰風，她一時俊朗豪邁，一時性感冶艷，深深吸引子穎，更離奇的是，家明原來與她有過一夜情，三人的複雜關係又再糾纏不清！ |
Fans等候偶像超勁耐力
 |
月黑風高嘅一個晚上，原本人影都唔多隻嘅濠涌片場。以為好早到嘅我，發現多咗好幾個「銅像」。靚靚一出現，佢哋會郁個喎！原來係啲超級fans，佢哋等侯偶像嘅耐力同精神，非一般人所及。所以靚靚都係咁叫佢哋返去。但係點解有啲郁都唔郁嘅？經過幾個鐘頭嘅考驗，佢哋依然抱住一動不如一靜嘅諗法，一於死等。皇天不負有心人，哥哥同梅姐終於都出現喇，見到佢哋打從心底流露嘅喜悅，顯出無比興奮。終於畀佢哋等到啦，埋唔埋到身？則係另一回事！ |
|
富田靖子探哥哥班
探班嘅時候，發現有位黑衣靚女來了，睇真吓，確係日本紅星富田靖子，乜小春來了嗎？靖子同小春拍緊另一部電影。
佢話來探哥哥班，因為佢睇咗《新上海灘》覺得哥哥好靚仔，好handsome呢，之後再聽埋佢嘅歌，覺得好好聽添，於是呢位靚女又多咗個偶像喇！想話同佢影張相，點知佢唔肯，原因係佢哋日本人一向堅持一點，就係「女人化妝係一種禮貌」，而偏偏那日靚女無化妝，所以死都唔肯影相。 |
 |
|
煞科慶祝果汁代香檳
拍煞科那晚當然唔少得開香檳賀吓啦！帶病嘅梅姐就戰戰兢兢咁開咗支香檳，而哥哥就出盡力搖，想話谷多啲泡。之不過人算不如天算，竟然得少少泡，哥哥就好失望咁望住個樽，再笑住咁同導演投訴：「有無攪錯呀！搵apple juice扮champaign！」其實咁樣做，無非都係唔想大家飲咁多啫，開工要緊吖嘛！ |
 |
哥哥同志偉幫拖埋尾
《金枝玉葉2》拍攝進度幾緊逼，導演陳可辛固然馬不停蹄全力趕貨，張國榮同曾志偉亦有幫手去拍，志偉負責搞笑嘅部分，呢個戲中嘅Auntie，發揮起工作拼勁一點都唔姐手姐腳，不知幾咁狠勁。哥哥兼埋幫手導演，係拍其中一場靚場景，啱晒佢對靚咁要求高嘅人，更難得嘅係，哥哥借埋佢間咖啡室出來拍，拍咗兩粒鐘，老闆做少咗生意？咁電影公司都識做，封番封利是唔使佢蝕本！
香港電視
LeslieCheungCyberworld © 2024 , All Rights Reserved