1998

張國榮狂谷42吋胸肌拍寫真

   1998-04-17

一代姣靚型寸始祖張國榮，98年再戰樂壇。全新國語大碟籌備三年，動用四百萬製作費，決定4月27日面世，更專程飛到日本請名攝影師操刀到溫泉赤裸裸拍露點寫真，拍照事前功夫更做到足，跑步游水健身氣功多管齊下，為求露出42吋胸肌騷本錢，殺盡天下男男女女。42歲的哥哥，露點春光下是首次乍洩，但姣靚型寸魅力依然百看不厭。

親自參與

哥哥全新國語大碟《PRINTEMPS》（法文意思：春天）鐵定四月廿一日面世，屆時更會在台灣舉行全亞洲記者招待會。這張大碟籌備近三年，唯美主義者的哥哥更參與了整張大碟所有製作過程，包括提議拍攝露點寫真。

「要做就做到最好，我花咗四日時間去日本拍呢本寫真，仲提議攝影師去溫泉取景，一來意念新鮮，二來我都未浸過溫泉，原來非常之舒服，差啲唔捨得走。」哥哥笑著說。

既要露點浸溫泉拍寫真，哥哥事前功夫當然做到足，例如更加積極運動KEEP FIT，勤練氣功，看哥哥溫泉展露結實胸肌的一幕，根據有經驗的健身教練斷，擴胸時至少有42吋胸肌。

「我有無42吋胸肌唔話你知，你自己估啦！不過我私人健身教練真係幫到我好多，我唔係要好大隻，成個阿諾舒華辛力加咁，總之有線條美，影相出嚟靚就已經夠。」

今年42歲的哥哥，擁有42吋胸肌，依然青春活力，究竟有何妙法保持這個「不老的傳說」？原來很簡單，戒煙戒酒早睡早起生活正常兼練氣功就可以好似佢咁喎。

「我無刻意保持青春，皮膚一向都靚，影相唔使做護膚㗎！最緊要每日做運動，例如我年多前請咗個私人教練，佢收費又唔貴，教我做運動擴KEEP住體能，咁已經好FIT。」

雙腳受傷

為了這張國語碟，哥哥港台兩邊飛，但三月初在台灣拍新歌《My God》MTV時便不小心跌傷腳筋，到現時為止仍未康復，剛回港的哥哥更要馬上睇醫生檢驗。

「嗰日喺台灣拍MTV，因為之前落過雨，個場地又濕又有青苔，唔小心一跳就跪咗落地下，仲即刻入醫院。醫生叫我休息三個月，但根本無可能，唯有頂硬上。而家跑步又唔得，坐耐啲企耐啲都痛，所以你會見到我其他新歌嘅MTV部係坐喺度拍，因為我都企唔到，初初仲要坐輪椅代步。」

行動的不便，唱片公司免得哥哥勞動太多，於是決定在台灣一次過舉行新唱片記者會。但無論傷勢如何，五月哥哥鐵定到日本進行大型宣傳活動，決意打開日本市場。

唱日文歌

今次新碟公司幫我安排Chaga&Aska幫我度身訂造咗一首歌俾我唱，叫做《Love Like Magic》，碟內會有中文版及日文版。先前我到日本拍寫真集都有喺當地宣傳，仲舉行咗一個「張國榮之夜」聚會，邀請咗1500位fans入場，不過我知道有千幾個fans入唔到場喺門口喊，我覺得好唔好意思。至於在日的宣傳招數何等巴閉，哥哥話要賣個關子，但必定會打破亞洲人在日本宣傳唱片的紀錄，相信大家要拭目以待。

哥哥健身教練Cantlie教你練大隻

C：Cantlie  壹：記者

壹：哥哥平時勤唔勤力健身？

C：佢好勤力，係我意料之外，如果任何運動姿勢做得唔好，佢會由頭做過，做到好為止。平日喺屋企又經常做運動，就算去咗第二度做嘢，佢都會打電話返嚟話俾我知每一日做啲乜嘢運動keep fit，所以我好放心。

壹：會唔會因為哥哥咁紅，你教佢做健身會百般遷就？

C：梗係唔會啦！我對每個學生都一視同仁，你問哥哥就知，我份人好長氣，不停喺你身邊提你做好啲，做運動又唔睇書睇電視，只可以聽歌。

壹：你教健身收費係唔係好貴？

C：（想了一回）每堂400-600蚊上個半鐘，差唔多啦！

壹：如果要keep到好似哥哥咁fit，要練幾耐？

C：其實要睇你本身嘅體質而定，最快都要九個月至一年，最緊要有恒心，先減你身上多餘脂肪，再收緊肌肉練大隻。如果叫你踩10分鐘單車就叫辛苦，咁我都無辦法。

壹：哥哥最近受傷，咁你點安排佢做運動？

C：佢隻腳傷咗我都知道，所以會安排佢上身嘅運動保持健美囉！

Cantlie提醒各讀者要健身練大隻或者減肥並非一朝一日，除做運動外，飲食都要注重，最好少食多餐，每日大概吃五餐，每次吃6-7成飽便可以。至於哥哥食啲乜？Cantlie話無特別安排給哥哥，因為自己並非營養師，但知道哥哥每日早餐會食半個木瓜、一塊麵包、一隻雞蛋白及一杯脫脂奶，平時少吃肉類以保持身體吸收更少脂肪。

壹周刊