2002
張國榮要比《鎗王》之時更癲
2002-04-04
電影《異度空間》大多數的新聞焦點都集中於女主角林嘉欣身上，緋聞、跟蹤、挖瘡疤傳媒通通用盡，令人不其然對林嘉欣有非一般認識，而相反男主角張國榮就變得比較低調，不過，做戲始終都係講實力，如果大家睇完《異度空間》後，都會認同哥哥的而且確做得精湛，而且會感覺一個比《鎗王》更癲的張國榮在大家腦海中不停浮現。
《鎗王》的延續……
 |
記得電影《鎗王》入面，哥哥演繹一個愛鎗成狂的鎗迷，入面每個瘋癲的表情都令人難以忘記，大家會驚訝平時斯斯文文的哥哥扮瘋漢一樣可以神似，過幾年後的今日，哥哥再度在《異度空間》內扮演精神有問題的角色，相似的演繹，會否覺得無難度可言？
「其實每個角色都有它的難處，有它對演員的挑戰性，而今次的角色無疑與《鎗王》有點相似，不過我當然想擺脫觀眾以往的感覺，所以開拍之前，我都有去做好多資料搜集，去睇番以往一些關於精神病的電影，甚至我有走去問一些做心理醫生的朋友，同他們談話了解他們的生活，工作背景和以往所見的病人。」 |
睇好林嘉欣攞獎
《異度空間》雖然今年無緣參加今屆金像獎，但戲中對手林嘉欣就憑《男人四十》獲提名最佳新人獎，咁哥哥對呢位新人拍擋有何睇法呢？
「我覺得佢演戲方面好有潛質，唔似之前只拍過兩齣戲的新人，至於問我佢金像獎有無機會，我就唔肯定佢一定有，不過我聽番行內的朋友對林嘉欣的評價，都覺得佢做戲好自然，可以好放咁投入角色度，所以我都希望嘉欣可以得獎，算係對一位有潛質新人的一種鼓勵。」
人生非無求
唔少人會認為哥哥無論歌唱演戲都有過無比的風光，從一個男人事業角度來講，可以話一句死而無憾，但原來在哥哥眼中還有一件東西最想得到，就係當上導演，事關哥哥覺得無論自己的戲演得多好，都只不過係導演眼中一隻棋子，導演才是主宰一切的人，所以佢想拍出自己心目中完美的電影，將來在頒獎禮中攞獎，不過目標唔係最佳導演，而係最佳電影，因為呢個獎先可證明自己可以做一個好導演，好有效率咁領導全體工作人員，拍出理想中完美的電影，更有成功的感覺。
Monday周刊
LeslieCheungCyberworld © 2024 , All Rights Reserved