2001

澳洲片商重拍英雄本色力邀狄龍哥發仔哥哥做串星

張國榮：諗都唔駛諗!

最近澳洲一名投資者，睇中吳宇森十多年前拍成的《英雄本色》，有意購入版權再找當地演員重拍，他們更特別發信邀請周潤發、張國榮和狄龍客串Opening，不過這個構思已被張國榮拒絕，他說：「要搵我哋三個合作，簡直係大想頭，諗都唔使諗！」

由吳宇森執導，周潤發、張國榮和狄龍主演的《英雄本色》，八六年上映時曾掀起全城「嘜哥」熱潮，發仔、哥哥和狄龍三人更是憑這部電影成功上位，故此，這部電影最近被澳洲片商睇中，重新翻拍，絕對唔出奇，不過奇就奇在，他們欲找發仔、哥哥和狄龍再次合作，並非搵他們做主角，而是做「串星」。

哥哥笑說：「咁你話係咪大想頭，既然咁貴搵得我哋合作，竟然唔係做主角，只係做串星，你話係咪諗都唔使諗。」

主力拍香港片

哥哥張國榮曾經講過不希望進軍國際市場，果然講得出做得到，近年都只是見他接拍港產片，最近他便演出爾冬陞執導的《幽靈日記》。

對於早前有報道指張國榮在加多利山買入一幢別墅式洋房，哥哥哼一聲說：「啲資料錯晒，價錢又唔啱，我都費事再提，其實董建華最近有一句說話講得好，就係『唔會回應啲低級趣味嘅新聞』，我以後都會以『無可奉告』嚟回應。」

其實，張國榮曾移民加拿大，但近年已將基地搬回香港，在加國已沒有任何物業。近日，張國榮正忙於為電影《幽靈日記》埋尾，咁啱得咁蹺，片中的導演和演員都相繼入籍加拿大，包括哥哥、李子雄、爾冬陞和林嘉欣，而周嘉玲又鬼鬼地，所以他們在拍戲現場得十分啱傾，話題都是圍繞美加的人和事。

《英雄本色》勁收三千四百萬

《英雄本色》一九八六年八月二日公映，上映六十一日勁收三千四百六十多萬元，成為當年全年賣座冠軍，演員周潤發、張國榮、狄龍更即時人氣勁升，由票房毒藥變為票房靈丹。

連當時仍屬新人的李子雄亦片約不斷，導演吳宇森憑該片獲多項電影殊榮，現更已經晉身荷里活頂級大導演之位，首集票房報捷後，隨後開拍了《英雄本色2》及《英雄本色3之夕陽之歌》，歷年亦有不少外地片商欲把《英》片改拍。

太陽報