1997
張國榮冒雨廣州演唱 歌衫件件性感
1997-06-15
|
七彩閃亮斜膊露臍衫，超短熱褲，再加上一頭鬈曲駁髮－－你認得佢係邊個嗎？唔好睇錯，佢唔係女人，佢係我哋嘅「哥哥」－－張國榮，哥哥呢個新LOOK係咪好似「女泰山」呢？
前晚，哥哥在廣州為其世界巡迴演唱會最後一站舉行首場演出，雖然已做到最後一站，但哥哥一點也不馬虎，唔只駁髮搞搞新意思，還加插多件新衫，仲要件件性感，露腿露臍露膊露兩點，妖艷迫人，睇到全場三萬觀眾如痴如醉。 |
 |
秩序大亂險腰斬
 |
今次是哥哥首次在廣州舉行演唱會，然而，天不作美，整晚下著滂沱大雨，由於演唱會在露天場地舉行，觀眾不肯坐濕櫈，個個擔傘站著睇騷，更有觀眾乘機博懵湧到台前近距離睇哥哥，秩序大亂，哥哥返後台換衫再出場時，一度暫停演唱勸喻歌迷：「各位觀眾，請回到你們的座位，否則演唱會將被迫取消，我先前入後台換衫時收到消息，公安怕會踩死人，叫我勸喻你們， 我好唔忍心話俾你們聽 ……其實我都好鍾意熱鬧氣氛，只不過國家有這個規例，大家可以坐低，繼續熱烈支持。」
觀眾好聽全部乖乖坐低擔傘睇騷，不過，雨越下越大，簡直傘無用武之地，人人衣衫盡濕，情況狼狽，但沒有觀眾因此而提早離場，哥哥見觀眾咁支持他，而自己在台上就有瓦遮頭，為報答觀眾，三番兩次走進雨中陪觀眾一起淋雨做「落湯雞」，哥哥更感動說：「雖然今晚天公俾我咁大一場雨，但你地依然堅持風雨無改咁支持我，好多謝，我覺得好榮幸，幾多後浪都無所謂，堅持就係我嘅信念。」 |
六十場已近尾聲
 |
事後哥哥開心地說：「好開心，觀眾淋雨咁支持我，好感動，之前都有少少擔心會漏電，好在大步檻過。」完成廣州三揚演出後，哥哥六十場世界巡迴演唱會便大功告成。 |
東方日報
LeslieCheungCyberworld © 2024 , All Rights Reserved