Leslie Cheung Cyberworld

徐克新作無冷場寶寶俞琤齊讚賞

文：阿吉（林冰）

終於都睇了徐克部《金玉滿堂》嘞，阿吉係與馮寶寶一齊睇嘅。寶寶好似好鍾意部戲，不時與阿吉交談，話：「好睇呀？成一百分鐘完全無冷場。」又話：「我好鍾意徐克個腦袋。」

睇完首映出來，係戲院梯間遇到俞琤。雲妮話：「阿吉，部戲比我想像好好多。」點解佢又想像部戲唔係咁好呢？雲妮話：「好耐都無睇徐克咁拍戲，次次都似坐過山車咁。時間咁趕，我諗住一定無咁好，又估唔到都咁好。」

阿吉問：「賴士里同由袁詠儀開頭搞笑啲戲，會唔會『硬』了少少呀？」

「唔會呀，幾好呀，最衰係遲上呢，早啲拍完早啲上，好似人地咁，已經收了好多錢啦。」雲妮同南生好感情，好關心老徐。遲就好閑噃，大部分賀歲片都睇晒，過年幾日大假無嘢做，齊齊去睇呢部，咪又係一樣好。

後尾同舒琪傾開，舒生都認為哥哥同靚靚係廚房搞笑啲戲「硬」了少少。佢話：「部戲真係一啲都睇唔似係趕出來嘅。最後一場猴子腦嘅處理好出人意表。

哥哥做黑社會大佬，係酒店與班「靚」傾偈，果啲坐姿同舉止好趣怪。你只會諗到呢個爛仔一定係富家公子淪落嘅，事關賴士里點扮都周身貴氣。

1995-01-00