Leslie Cheung Cyberworld

無怨無仇何用怕張國榮如常做人

文：阿吉

昨日，我地六十幾人分兩班船赴澳門，此去是採訪張國榮、周星馳他們往澳門賽馬會頒一項名為「永高」盃的獎項。這個獎項頒給第三場的冠軍騎師、練馬師和馬主。

吃中午飯時，我與張國榮坐在一起。坐下未幾，有個人走過來說：「張生，我係負責呢度嘅保安，亦即係你嘅保鏢。」張國榮輕輕望了他一眼，應了一聲：「嗯！」，沒有再說。

我問：「Leslie，發生了暴力劫底片，並聲言係針對你張國榮的，你驚唔驚呀？」

「我唔驚。阿吉，學你話齋，我同佢哋又無仇，佢哋對付了我，又唔會得益。驚亦唔驚得咁多，我做呢行咁多年，乜嘢未見過，無得驚嘅。」

張國榮話：「我相信打電話去威脅，話張國榮上一套戲就搞一套，係有人惡作劇。劫底片嘅事未必同我有關，話有人請我拍戲，永高拒絕了，呢件事我唔知。我同百鳴講，既然係咁，我哋解約，百鳴話唔得，如果咁都俾人威脅到，我哋做正行生意嘅，重使企，佢哋咪更得戚？百鳴話唔應該退縮。」

張國榮話：「阿吉，你地傳媒更加要支持我地，咁搞法，學發仔話齋，所有紅小生都會引退，電影更加無得做。」

隨後張國榮話：「我同一間外國公司有經理人合約，即使有人屈到我拍戲，佢哋亦無法子推出公映。實在無辦法，我返加拿大唔拍戲。」又話：「我返來拍戲係因為我鍾意拍戲。」