1994

袁詠儀封張國榮做「千年棘手老前輩」

有人話袁詠儀真好運，三爬兩撥就上了第一線，連人地朝思暮想嘅最佳女主角獎都攞埋。但Anita就最唔鍾意啲人話佢好運，因為佢都付出過唔少努力。雖然佢強調自己都好努力，唔願承認有今日屬好運，但佢拍《金枝玉葉》，與張國榮交手，就令佢大開眼界，知道乜嘢叫努力，先發覺自己嘅努力真係大大不足夠。

袁詠儀話：「張國榮每日都有做功課。我呢，最多睇熟自己啲戲，無理人地點做，Leslie唔同呀，佢不特熟讀自己嘅戲，仲記住對手當時企乜嘢位。如何走位，講乜嘢……」   佢繼續話：「我做戲時，每講一句，Leslie都俾到反應我，唔同嘅對白，佢有唔同嘅反應，鏡頭未必影到佢，佢都做足反應幫我入戲。」

拍攝場地所見，Leslie確係認真非常，他對每一演員的對白及場口均瞭如指掌。比方有場戲說Leslie替參賽者面試，他連對方在上一場戲時所唱的Key都記得，然後更親自作示範！

話說袁詠儀跟前輩Leslie合作，第一天沒對手戲，安然過渡；第二天，初度交鋒，Anita即告敗陣，NG吃足九次，吃到反胃反肚，不得不向張老前輩拱手寫個「服」字。

向來口齒伶俐記稿當食生菜的袁詠儀，當日需一口氣說出八行字的對白，本來不是問題，不過一對著賴士利張，金像影后口舌無端打結，上文不接下理，顛三倒四，總之一團糟：「我太緊張啦，對住佢我簡直徹底失敗。弊在我亂哂籠，佢仲完全無事，邊句接邊行，完全記得一清二楚，相比之下，我就像一個老臨般口震震，出哂汗，劇本都揸到皺晒。」

向來望兩望劇本就口若懸河的她今回英名盡喪，她說：「越拍越驚，死啦就快九個take啦，好瘀。拍完之後，成頭汗，平日拍戲叫cut我即刻周圍玩，周圍搞，今次一叫cut，我自己一個坐下來，對著劇本，托著頭，透大氣，覺得自己完全生意失敗、婚姻失敗、前途盡毀咁款，Leslie無事，走過來安慰我，叫我唔好咁亂，飲啖水……我仲要死撐扮鎮定話無事。我想他可能在心裡想：「平時又話好叻嘅？咪又係咁」Anita痛定思痛，深切反省下，發覺自己平時太懶，決定洗心革面，緊記勤有功，戲無益戒條：「Leslie拍戲之前都會用本簿寫下自己的場口和對白，令自己加深記憶。今次我在這樣無面的情況下，一於照跟，已經做了三晚功課。」

袁詠儀向來膽粗粗無有怕，Leslie可謂是第一個令她怯場的人，原因很簡單，少女情懷總是詩也。     「想當年我去看他的告別演唱會，緊張到胃抽筋。自從他告別樂壇之後，拍戲也很揀擇，上次有機會和他拍《大富之家》，雖然沒有對手戲，但已經很開心。今次幾難得有機會和他合作，一聽到這個機會早就Lam晒脷。那知結果失晒準，連陳可辛都問我點解好似好驚咁，認真失敗。」   對於Anita送上的一個「七字牌匾」，Leslie笑了笑：「Anita玩嘢啫，但佢向我學習都啱嘅，話晒我入行都咁多年咯。」當日Anita吃了一頓教她無地自容的「九子連環蝦碌餐」，以至自比「破產友」，他唯有好言安慰：「其實NG九次唔算多呀，我拍《阿飛正傳》，同張曼玉試過NG五十幾次，都無嘢呀，只係演員同導演溝通唔一致啫。Anita都算係一個好聰明嘅演員，但仲差啲時間。」

Leslie獨步俊男榜多年，至今地位仍然穩如泰山，連閱歷無數的劉嘉玲小姐，亦情不自禁地說：「Leslie好有魅力，全身每個部位都好靚，成個人好有風采，雙眼直情唔想離開佢，好想望佢耐啲！」

可能已經被讚超過九萬次，Leslie完全不感意外：「人地覺得我有神，可能我好耐都未試過踩幾組，精神啲啩！」這齣戲，Leslie的角色是專門發掘新人的唱片監製，但觀其依然俊俏的靚樣，難保觀眾拋出十萬個為甚麼——點解佢唔捧自己做歌星啫？紅梗啦！

Leslie不以為然：「電影係要make believe，將所有嘢整到真嘅一樣。現在啲觀眾好聰明，所以一定要做多啲 research，遲啲我會同一啲歌星監製唱片，唔會話唔似嘅！」Leslie眼見筆者仍然充滿懷疑的目光，因此再加一句：「記住呀，呢套始終都係戲，聽古唔好駁古呀！」

哦，千年棘手老前輩！

香港雜誌