1987

程小東談《倩女幽魂》

程小東出身藝術世家，自言喜歡浪漫，但生活得非常實際，他自小便懂得照顧自己、保護目己，他父親遺留給他的才子氣質、浪漫情懷，他只會表現在他的電影裡面。李翰祥說：「程剛（程小東的父親）不是不負責任，也不是玩世不恭，其實他是完全情緒主義。今日程小東剛剛相反，生活實際，攻於世故。」

你在電影中設計的場面，往往大膽、誇張，但是精彩悅目卻屬事實。

這是險著，險中求變，就是目前為止，有觀眾認為我的東西誇張，唔知搞乜，但接受的觀眾會非常接受。我比較注重設計，試圖加強電影感，用旁支的東西吸引觀眾注意力。

一般武打片的鏡頭都是四平八穩用來証明是真功夫，而你的電影會加入許多元素，你是否故意朝相反的路走？

一點點，我較注重靈感，玩多些特技，試新野，大家都想變。不過好危險，可能我是失敗，因為上兩部拍得咁辛苦，票房都是麻麻，可能人地的做法是對的，他們受歡迎，証明觀眾鍾意。

觀眾鍾意喜劇，你又唔拍？ 

唔得，我無別人的幽默感。

今次《倩女幽魂》是古裝文藝片，這是否重大轉變？

我其實喜歡拍時裝片，不過文藝片也想拍，我喜歡浪漫同靚的東西。我們由武指轉導演的，好容易被人睇死拍不到文戲，所以我想儘量試吓。 

《倩女幽魂》是不是【聊齌】的原著故事？

是，大骨幹來自好多年前樂蒂做的那一部《倩女幽魂》。

今次有乜「杰野」放入去呢？我以為導演會霹靂嘩啦講述自己的作品，可惜，小東竟然低調處理。

盡量啦！文戲搞好啲，武打搞好啲！度度加啲。

你自己滿唔滿意？

好難講，自己太主觀，一部戲自己睇咗成百幾次，好麻木，想嘔咁滯！  

你好像不太熱衷做導演？

導演搵唔到食，做導演有邊個發達吖。像《倩女幽魂》拍了八個月，三個月籌備劇本，劇本執執改改又半年，戲拍好，跟住配樂，搞宣傳，時間長、壓力大，拍完又要俾人話......做武指無壓力，有工就開，好與不好，只要應付導演，無人會話你。  

我見你哋度招，好多是臨場度，這樣壓力也很大？

基本上都有個大「廊」，現場是執「荀口」，無理由成班人等你度招。 

你自己度招揸埋機？

是！自己睇埋機會清楚看到效果，最怕拍了出來不是自己想的要求。不過，這樣做要先得到導演的信任。

電影雙周刊