2003

張國榮否認百萬元投廟為箍煲

憑《異度空間》角逐今屆香港金像獎男主角的張國榮，近年一直少有公開露面，除有說哥哥拍竣《異》片後身體麻麻兼撞邪外，近日更指哥哥為挽救和好友唐鶴德的感情，在去年以暗標100萬元競投大坑蓮花宮來積福箍煲。哥哥昨日否認投標一事外，精神及心情甚佳，一臉神采飛揚，看來撞邪之說亦不攻自破。

哥哥昨日下午二時半從加多利山的寓所外出，架了墨鏡的他，見到記者表現友善兼笑容滿面，精神相當不錯，上車前並大方地停下接受訪問。當記者恭喜他入圍角逐金像獎影帝，問到有否信心奪獎，他說﹕「入圍當然開心，個個對手都好強，而且全部都係影帝，邊個攞都開心。（有否看過獲最多提名的《無間道》﹖）有﹗部戲好好。（華仔同偉仔邊個做得好啲﹖）兩個都係我好朋友，兩個都做得好好。」

哥哥近年少有工作及公開露面，最近一次公開露面是香港電台的「十大中文金曲頒獎禮」。工作方面例如和黃耀明合作的新碟《Crossover》沒有參與宣傳外，就連預計和張艾嘉一起執導的電影《20‧30‧40》都要推辭，外間遂有哥哥因拍《異》片而撞邪，引致健康不佳要暫停工作的傳聞。對於撞邪及患重病的傳聞，哥哥先是微笑，然後反問記者說﹕「你而家見到我覺得點﹖」至於何時才重新投入工作例如錄音，哥哥說﹕「我而家把聲沙沙地，因為胃液倒流先至係咁，都已經有一段時間。不過，好快會無事，好快會重新投入工作。」

另外，有消息指哥哥去年以一百萬元競投大坑蓮花宮，除可積福外，更指哥哥此舉是為挽救跟好友唐鶴德的感情。問到哥哥是否競投大坑蓮花宮，哥哥即邊搖頭邊笑反問記者﹕「乜嘢嚟架﹖我無聽過，我無喎﹗」語畢即跟記者說再見，然後上車。看來哥哥心情及精神相當不錯，加上對競投一事顯得一無所知，可見有關傳聞的可信性甚低。

互相尊重

近排哥哥張國榮都幾低調，養尊處優之餘，對於坊間嘅風言風語亦懶理，呢種百毒不侵嘅功力，唔係一朝一夕鍛煉得來。

昨日娛樂組獨家訪問到哥哥，佢好客氣咁任影唔嬲，有問必答，對於啲乜野撞邪傳聞，競投蓮花宮廢話一一解答，大方得體，好鬼可愛。哥哥份人就係咁，佢對人嘅要求，尤其記者，你敬我一尺，我敬你一丈，只要對方有禮貌，問過佢可唔可以做訪問、影相，佢多數會應承，只要大家基於尊重原則，就乜都無所謂。其實辣子最清楚呢一班捱出來嘅紅人，對人最體諒，最有同情心，因為自己都吃過好多苦頭吖嘛，如果將佢激嬲，攪到唔合作嘅記者們，自己檢討吓對人嘅態度啦！

星島日報