Leslie Cheung Cyberworld

2006

樂壇記事寶：張國榮火紅過塘變身整蠱專家

2006-03-18

第七話：張國榮（上）

口述：陳少寶　撰文：張止寒

張國榮出道並非平地一聲雷，熬了好一段日子才走紅。

張國榮（Leslie）喺華星過嚟新藝寶，係佢事業嘅巔峰期，我識張國榮係喺商台做DJ嘅時候，當時六pair半有鍾保羅，我因為鍾保羅而識張國榮，但大家唔算深交，只係飲過吓嘢，互相知道有對方呢個人。

更上一層樓

我八六年入新藝寶，嗰陣新藝城電影好行，娛樂圈係一個極度講關係嘅地方，八五年（應為八六年）Leslie拍咗《英雄本色》，已經紅到爆，唱《當年情》（八五年）嗰陣同華星開始反面，咁新藝城成立咗唱片部新藝寶，佢順理成章有機會過嚟，因為我識得佢，加上大家都鍾意音樂，所以八七年我簽佢嘅，出咗《無心睡眠》同《倩女幽魂》（收錄在八七年《Summer Romance》大碟內），成績好理想，Leslie事業亦更上一層樓。

我簽佢時，個個都覺得我好勁，同佢做《無心睡眠》隻碟，開記者會時我遲咗九個字，啲記者一早嚟晒，我仲遲過Leslie到，佢遲到冇半個鐘，我就遲九個字，我一到全世界都走埋嚟抦我，乜嘢原因遲到我唔記得啦，好似係塞車。Leslie冇詐我型，但佢經理人陳淑芬就罵到我趴街，我上司施南生就媽到我瞓街。

左圖：Leslie當年替新藝城拍過不少電影，施南生（右）當時任職新藝城高層。

張國榮當年在富麗華酒店與歌迷聚會，

獻唱他的經典名曲《Stand Up》。

鍾楚紅是張國榮無綫音樂特輯

《日落巴黎》的女主角。

從來無爭拗

講真嗰句，如果換係今時今日，有機會我都未必敢簽，因為佢當時已經咁紅，要再贏好難，即係《英雄本色》第二集贏唔到第一集一樣。但當年我後生，真係幾考運氣，娛樂圈真係神奇行業，唔可以用一般投資角度去計算，真係要睇對呢個行業嘅興趣。

我同Leslie相處得好好，從來冇嗌交，其實我都好好彩，冇乜話同藝人真係嗌過交，就算同李克勤都唔算係真係嗌交。Leslie好鍾意整蠱我，佢好多鬼主意，整蠱到我就好開心。八八年去東京國際電影節，我記得晏晝食日本菜要除鞋，佢收埋咗我對鞋，等我周圍搵冇得走，搵咗好耐先搵到。

左圖：陳少寶指Leslie很貪玩，自己經常被他整蠱。

有一次佢生日，淨係喺話Regent（麗晶酒店、現為洲際酒店）有個party，好casual大家食吓飯，仲叫我早啲去打牌。我嗰日著住T恤短褲，踢住對拖鞋去，去到其他個個著到好靚，嗰日係食自助餐，成晚都要蘇施黃（商台DJ）同我攞嘢食，好彩個個都識得我，兼夾係Leslie嘅party，唔係我著成咁都唔使旨意入到去。

2006

樂壇記事寶：張國榮火紅過塘變身整蠱專家

蘋果日報