2000

揚言JPG設計全新個唱服飾 哥哥被鄧達智踢爆著舊款衫

 2000-08-11

張國榮日前揚言其個唱服飾，由法國著名時裝設計師Jean Paul Gaultier特別設計，但本地設計師鄧達智卻踢爆哥哥的JPG服飾乃舊款衫，其實哥哥部分歌衫的設計，早於今年一月的JPG時裝騷曝光。

年屆四十三歲的張國榮，上月底再度踏足紅館，舉行一連十三場的《張國榮熱．情演唱會》，哥哥（張國榮）聲稱演唱會的舞台服飾均由法國著名設計師Jean Paul Gaultier為他全新設計，衣設計大膽豪放，姣味十足，坊間反應毀譽參半。

每件平均五萬

本地著名時裝設計師鄧達智，昨日在新城中環直播室接受記者訪問時，雖然大讚哥哥穿JPG的衫好看，卻大膽指出哥哥在演唱會穿的JPG服飾其實已過時，他說：「呢批衫唔係特別設計，都係舊款式，JPG翻抄自己！」事實上哥哥這批歌衫屬JPG高級訂造服，其款式早於九九年已曝光。

William（鄧達智）此言，似乎有暗示哥哥「舊衫」之嫌，記者事後致電William，他說：「我諗大家誤解我『舊款式』字眼，其實我指JPG不斷採用一原有元素，令佢更完美。今次哥哥批衫應該係JPG Haute-Coulture，全部度身訂造，每件平均要五萬蚊，幾貴！」

「哥哥一百分」

話雖如此，William盛讚哥哥JPG的衫好看：「有人可能覺得佢自覺不足，所以成著咁，我就認為好玩、精彩兼自然，哥哥著得咁激，都著出份味道。」

怎看哥哥穿裙的「莎朗史榮look」？William說：「歐洲男人台上裙好普通，哥哥又唔係扮女人變性，就算呢個年代變性都冇特別，哥哥著裙即係靚男人著靚衫，我哥哥一百分。」

Willam直言期待哥哥下次的演唱會服飾可以更前衛，他說：「佢可以試吓Alexander Mcqueen、John Galliano或者Hussin Chalayan嘅服飾，show多身材。至於髮型，哥哥一直備受禿髮問題困擾，佢頭形咁靚，下次不妨剃光頭，效果會更加自然。」

此外，哥哥的演唱會將由原來十二場，加開明天一場，而門票更於昨日開賣，數小時內售清。

內地演唱收斂

哥哥會於下月十六日，在上海舉行個唱，由於尺度關係，哥哥不會在內地以過激形象示人，主題會是「金曲重溫」，故內地觀眾無法看到哥哥著裙示人。

東方日報