2004
君如約定哥哥天國合作
2004-04-02
「哥哥……」一聲聲的輕喚，牽動着袁詠儀、吳君如、蘇絲黃、張學友、林憶蓮、陳淑芬、林夕、陳小春、林嘉欣、陳冠希、黃寶珠、髮型師Herman等好友內心深處對哥哥（張國榮）的思念，雖然哥哥身在一個遙遠恬靜的地方，但哥哥跟他們彼此間那份深厚的情誼並無任何阻隔，他們知道哥哥永伴身旁，在昨日哥哥逝世周年紀念的日子，他們透過「雲妮鍾情」、「娛樂滿天星」的電台節目盡吐對哥哥的心底話。
|
|
吳君如：「哥哥，我係君如，其實呢一年嚟我成日喺夢中同你相遇，成日同你傾偈、講笑，每次攞獎都會諗你，因為喺我人生最重要嗰幾個獎都係你頒畀我，所以記得你嘅一句說話：『我幾旺你』！舊年我攞金馬獎我又諗起你，每次我有乜電影出嚟，你都會打畀我話：『衰嘢吖，又做得幾好噃，幾時搵番部我哋一齊做。』我覺得總會有呢一日，即係你喺嗰邊，我嚟到，你諗定拍啲乜，我哋可以合作……我好掛住你哥哥。」
張學友：「哥哥你好，我係學友，前幾晚睇電視見到播你個特輯，咁先知道原來你放咗假成年，我到今日都仲好希望四月一日係愚人節，所有發生嘅嘢都係假，無論如何都希望你放假玩得開心，唔知你嗰邊點嘅呢？天氣好唔好㗎？多唔多人陪你呢？如果見到我識嘅朋友，唔該幫我問候吓佢哋，我依家都OK，我會開開心心咁過生活，會畀心機做嘢，會叫佢哋多啲關心、珍惜身邊人，玩嘅時候開心啲，做嘢時候認真啲，總之喺我嚟探你之前，我都會盡量咁每日過得充實，過得有價值啲，byebye！」 |
陳小春：「Hi！記唔記得我唔鍾意叫你做哥哥，我鍾意叫你Leslie或者張生多啲，你呢一年應該過得幾愉快吖，希望你幫我同師傅Roman（羅文）同另一個師傅阿梅打個招呼，希望你哋喺上面幫我哋香港人發展得好啲，等我哋上到嚟之後，一定幫你一把，懷念你Leslie。」
望薪火相傳
袁詠儀：「哥哥，我係阿靚，呢一年你點樣呀？我唔錯，你曾經同我講過作為一個前輩要不恥下問，唔好吝嗇將自己嘅經驗教畀新人，我有學你咁做，希望你繼續支持我，等我好好完成將你教畀我嘅嘢去教畀其他人。」
林嘉欣：「Hello哥哥，我係肥妹，唔知你好唔好呢？我啱啱拍完部戲嘅煞科，依家唱K，不停唱你嘅歌，跳你嘅舞，我哋時時都掛住你，我 好好，唔使擔心，我依然係肥妹。」
陳淑芬：「Leslie，我係Florence，《煙花燙》送畀你，希望你收到我呢份心。」
蘇絲黃：「國榮，我係阿蘇，喂！你仲記唔記得三月廿九日我哋打最尾一場牌，你贏咗我幾千『蚊』，我用咗一年時間贏番，哼！醒呀，喺呢一年我哋盡量諗一啲你好恨去，但又冇時間去嘅地方，結果我哋去咗印度；嚟緊嘅日子我哋會繼續做你想做嘅嘢，我哋已plan好下一個trip，你最緊要同埋我哋一齊去玩囉噃。」
如失去右手
林夕：「哥哥，我係阿夕，你去咗嗰邊之後，忽然記得有個片段，有次你捉住我隻手揸落你個胸度話：『我依家幾健康，你睇我幾大隻，你都可以去健身，你咁孱弱，四月一日後我都未做過，我一定會的起心肝……你去咗嗰邊再冇機會幫你寫歌，就好似我身體一部分失去咗，好似左右手冇咗隻右手，有啲嘢我一定留畀你，唔會寫畀人。」
除了他們，還有憶蓮、婉婉、陳冠希等等，婉婉難忘跟哥哥拍戲時，哥哥每日在房中做sit-up運動，她覺得哥哥好健康自愛；憶蓮請哥哥放心，她一定會積極面對人生，繼續將好的音樂帶給大家，陳冠希要說：「大家永遠記得你！希望你依家開心，睇住我哋，睇住香港。」
東方日報
LeslieCheungCyberworld © 2024 , All Rights Reserved