Leslie Cheung Cyberworld

57歲冥壽哥迷獻心意張國榮巴士啟動

2013-09-13

文：馮仁昭 (馮仁昭四圍超專欄)

噚日係已故巨星張國榮（哥哥）嘅57歲冥壽，佢生前經理人陳淑芬同大批哥迷到沙田寶福山致祭，陳太即場展示限量發行嘅999本夏永康攝影集《Love Leslie》，首頁係哥哥生前同摯愛唐鶴德未曝光嘅合照，其中哥哥嘅生日編號912紀念集會送畀唐唐留念。

收益捐慈善機構

夏永康下晝喺尖沙嘴出席紀念影集首賣日，不過呢本公開發售嘅影集就冇哥哥同唐唐嘅合照，雖然影集之前因版權問題延遲咗出，但夏永康話哥哥生忌推出影集仲有意思，收益會扣除開支，捐畀哥哥生前鍾意嘅慈善機構，佢話：「籌備咗年半，諗番好多同哥哥嘅往事，唔覺得辛苦。」

好友鍾楚紅、張智霖、溫碧霞、薜凱琪等都喺微博悼念，紅姑話：「忘不了！」哥迷仲去咗尖沙嘴星光大道獻花，又集資喺九巴270A賣廣告紀念偶像生日；另一群哥迷就喺facebook發起「光榮行動冀建張國榮紀念館」一人一信請願行動，希望旅發局為哥哥建立紀念館。

另外，何超儀噚日喺臺北宣傳十月舉行嘅演唱會，超儀話哥哥、梅艷芳、羅文同陳百強對佢影響好大，到時開騷會唱佢哋嘅金曲致敬。