2013
張國榮家姐結婚 毛舜筠自爆坐主家席尷尬
2013-10-11
《最佳女主角》今晚嘉賓係毛舜筠，講起好多哥哥張國榮嘅點滴，毛毛好耐之前已經講過同哥哥兩小無猜拍拖時，哥哥曾經同佢求婚嚇親佢。
哥哥講過第一眼就鍾意咗毛毛，佢哋第一次合作就係做情侶，哥哥明正言順可以成日拖住毛毛。哥哥以前同毛毛講：「我哋好襯呀呵，你又靚，我又靚。」之後合作又好夾，不過毛毛話當時自己好多人追，哥哥又唔明，兼成日hardsell自己，仲成日問佢「我人靚歌甜!點解你唔鍾意我?」即係覺得毛毛唔夠鐘意佢。
毛毛話細個覺得哥哥都屬於靚仔，但入面未吸引到佢，當時係細路女，「求婚」搞到好大壓力，嗰時覺得哥哥「都唔係咁正啫!」哥哥當時就覺得追毛毛啲男仔好醜樣，但毛毛都肯同佢哋去街拍拖，自己咁靚仔，毛毛只係分四分一時間俾佢。
毛毛話都會諗「如果當時佢唔做呢啲野(求婚)會唔會好啲呢?」張國榮家姐結婚，毛毛受邀去到先知係坐主家席，因為哥哥帶過毛毛返屋企見家人，搞到毛毛當時都幾尷尬。
毛毛覺得哥哥當時所謂嘅「求婚」，係因為佢多人追，咁哥哥唔想佢多人追，所以想mark定佢先。毛毛話有時同哥哥講返呢件事，「如果我地真係結左婚，以後會點呢?」佢就話哥哥當時話:「點?咁你呢就會生幾個，你都似生得嘅人，我就會喺屋企湊細路，你知我個人幾好o架啦，你知道我唔去滾o架嘛，我一直都係一個就一個，咁我娶咗你，就唔會睇第2個，然後你(毛毛)呢，梗係去面偷食啦日日(毛毛大笑)，細細個已經咁啦，大個一定係咁啦!」從毛毛嘅回憶，都睇得出哥哥係一個幾咁率直嘅人。
毛毛同哥哥分手之後，喺拍《家有囍事》之後重逢，毛毛話比較喜歡後期同哥哥嘅相處，真係好似兄妹，無所不談。
爽報
LeslieCheungCyberworld © 2024 , All Rights Reserved