2013
Pro J財技特訓班：哥哥教你炒股
2013-10-16
文：徐燦傑 (中國銀河國際財富管理主管)
張國榮「不羈的風」教咗我哋，炒股一定要有不羈嘅心情，唔對路，即走！
在《蘋果》寫欄最開心係有充足嘅自由，寫乜都得，最緊要自己睇咗都覺得好睇同抵死，自己睇都唔開心，人哋又點會有feel呢！識Pro J嘅朋友都會知，除咗金融達人之外，Pro J亦都喺新城數碼音樂台有一個純音樂節目，叫音樂講經濟，都係要多謝台長銳哥畀我一嘗唱片騎士夢，真開心！
「快慰過了便再獨行」
講音樂點可以唔講我嘅永遠偶像──哥哥張國榮！細細過，佢嘅金曲已經陪伴我走過唔少嘅路！大個咗，將哥哥嘅金曲放喺投資智慧上，一樣掂，難怪哥哥可以成為一個劃時代嘅icon，向你致敬！以前買股票，好多人都會用「為你鍾情」嘅心態，即係「傾我至誠」包括所有錢，同佢哋一世。誰不知，如果你有呢種心態去買中國人壽（2628），你應該好想搵番個小二或小三頂住，唔係一定會唔平衡，哈！
21世紀「炒股睇大勢，睇位最實際」，哥哥都教咗我哋，要用「不羈的風」嘅歌詞，「快慰過了便再獨行」，先提醒自己炒股定要有不羈嘅心情，唔對路即走！例子梗係有啲股平均線由左上角向下飛散，唔走，未快慰先輸了，收到未？
當然有啲股，係掂都唔可以掂，即係拒絕再玩啦，不過股民好得意，係要同莊家一試身手！點都好，量力而為！
根據哥哥估市法，今日捉咗隻金風科技（2208），Prof J呢期勤力去捉轉勢股（即跌到殘），老總出嚟話行業復蘇，加上細摩又吹吹，再睇埋個圖，破咗6.56元，符合咗不羈的風條款！繼續追蹤！
隨咗哥哥估市出色，我偶像──沈大師一樣咁出色，佢嘅talk show我買咗飛兼實支持，你買咗飛未？
蘋果日報
LeslieCheungCyberworld © 2024 , All Rights Reserved