2014

邊位藝人最有「戲德」?哥哥張國榮最值「德」


 

2014-01-18

 

最值「德」尊敬的演員,發哥同哥哥都肯定榜上有名。

 

噚晚,導演爾冬陞就喺網上發聲明,話永遠唔會用一班「軋期」嘅藝人,即係有班藝人自己接戲接廣告接通告接到亂曬大籠,錢係賺好多,但啲期亂曬,拍電影係一大team人合作架嘛,唔通個個就曬你檔期咩!

 

     

講起一班「冇戲德」嘅藝人,「江湖傳聞」就永遠有好多,內地不時都會有啲「揞名爆」,講幾個比大家聽聽:

 

W女歌手:就話早年愛紅酒,曾經喺廣州演出時一到酒店就點咗七八支紅酒,全部唔同年份產地,當然,都係好貴,同埋係主辦單位埋單。

 

公主小姐:拍偶像劇出身,去黃山出席某個首映點名要住五星級酒店,最後一個人帶住4個助手,要求住一晚1700蚊嘅套房,而同場嘅米雪只係帶住個助手住普通房。

 

以上呢啲都係冰山一角,係真係假,都係工作人員先知,但依家啲藝人,一個人帶住造型師,化妝師,保姆等等開工,都唔係咩新鮮事,愈真係夠大牌嘅明星,作風愈低調。黃百鳴07年曾經接受內地訪問話:「他(張國榮)演什麼像什麼,從來沒有架子。電影到外地做宣傳,周潤發只帶一個人,就是他老婆,張國榮什麼人都不帶。現在的大明星,助手、化妝、發型師、保鏢通通要帶,一個人帶10個人,機票都是一大堆錢。唉,要是張國榮還在就好了,幫我省好多錢呢!」邱禮濤導演都話,發哥喺片場最鍾意就係自己煲湯「萬歲」,出錢都唔夠,仲要自己出埋力,呢啲演員身價高唔單止值得,更係值「德」!

 

 


蘋果日報(動新聞)

LeslieCheungCyberworld © 2018 , All Rights Reserved