1984
張國榮否認外傳在港登台曾俾人打
1984-02-23
文：阿藍
一日，阿藍喺華星娛樂有限公司，碰見張國榮。天南地北胡扯一輪。
臨走之前，仲攞咗佢隻大碟《一片痴》，由佢大筆一揮，簽咗一個名留紀念。
張國榮揸住佢自己隻唱片，非常滿足咁話：「而家銷路已過白金紀錄。」
「比第一隻《 風繼續吹》好噃？」
「駛乜講，梗係要一隻比一隻有進步吖馬。」
張國榮以前都出過幾次唱片，銷路都係麻麻，以前佢喺香港，真係冇乜歌迷。
佢入華星，一家便宜兩家着啦。
阿藍曾經聽過人哋話，張國榮喺香港登台，曾經被人打咗一身，而家見到面，梗係當面問吓佢，有冇啲咁嘅事。
張國榮聽到阿藍嘅說話為之，愕然，反問「乜你聽到我俾人打咩！」
「係呀！」
「呢啲係謠言。」張國榮好實在咁話：「你諗吓吖，我唱餐廳，價錢係最貴嘅一個，人哋坐滿哂，又點會蠢到俾人搞事噃，只要一搞事，一定就會有問題出現，血本無歸，所以，我唱幾場，唔知幾平。」
張國榮喺元旦幾日，在香港登台，歌酬係一日九千大元。
九千銀就唔係話好多，不過唱四十五分鐘，已賺到呢啲錢，又只當別論。
「雖然唱餐廳，可以賺錢，但為咗自己前途，都係唔唱得耐，唯有興趣係拍戲，如果拍到一部滿意嘅戲，或是大紅大紫嘅戲，認真值得。」
張國榮嘅屋企，家境富裕。
阿藍唔明白，點解張國榮分分鐘鐘講錢，佢做嘢都係錢掛師嘅。
「屋企人有錢，唔代表我有吖馬。」張國榮話：「做男人，做得有志氣，就要自力更生，唔通成幾十歲，仲要攤大手板咩！」
仲有，佢認為酬勞有幾多，係代表一個人嘅身價，價錢高，即係表示自己收得，有觀眾，「呢一年，我對自己嘅事業，充滿咗信心。」
張國榮同陳百強比較，前者電影發展佳，後者歌唱事業好，各有特色。
轉載自：okradee張國榮大事紀CHRONOLOGY
星島晚報
LeslieCheungCyberworld © 2024 , All Rights Reserved