1995
張國榮幾杯落肚有求必應
日前在東方電影公司的春茗及《金玉滿堂》慶功宴上，出現一個奇蹟，就係Leslie張國榮開金口喇！仲連續唱了三首歌，大家是否恨得牙痕痕呢？唔恨得咁多啦，不如等筆者在此為大家報道一下當時的《一串Memories迷你沉默是金演唱會》吧！
 |
Leslie說過，他絕不會假借慈善之名而重回舞台獻唱，若有一天他再出唱片的話，也不會做宣傳，即是，不會出席任何電台電視台的歌唱活動。他復出錄碟的目的只為一個——酬謝知音，而他站在台上唱歌的目的，也只此一個原因。
當晚，除了《金》片的演員及導演徐克之外，一班電影幕後(當然也包括了大老闆們)及遠道而來的謝賢四哥也有出席。
在這麼高朋滿座的情況之下，Leslie每次與老友們一見面就來個熱情大擁抱，噓寒問暖，可能也是幾杯酒到肚，整晚他也很High，笑得十分開懷，每每有賓客要求合照，他也絕無托手睜，大家開心。 |
|
記得上次電影公司安排記者採訪，榮哥哥唔鍾意，一句「我今日唔做訪問唔影相」之後即拂袖而去，可知採訪Leslie幾難，要他唱歌？更是難上加難，非要耐心繼續等兼且碰正他心情靚不可。話明係哥哥，以他今天的地位，就梗係甚麼也由他話事，他鍾意怎樣就怎樣，大家無得怨。
春茗除了吃和抽獎之外，當然也有唱歌助興，連最大粒的鍾鎮濤阿B也唱過之後，席上還有誰未上台呢？全場四百餘人的眼光不其然向坐在主家席的Leslie望去，在司儀盧敏儀推波助瀾之下，榮哥哥終於從容地起身，並不徐不疾地走過黎小田那邊，邀他上台伴奏說：「只有小田知道我唱甚麼key(音)。」 |
 |
Leslie未唱之前，指著台下的向生說：「我知這首歌向華強好鍾意的，聽講他在卡拉OK唱到流眼淚，可知呢首歌嘅感染力都幾大。」音樂響起，原來是《濃本多情》，N年前他與商天娥主演的一套電視劇主題曲。「情愛，就好像一串夢…」Leslie閉上眼輕唱，完全投入，是歌的感情抑或是五年前站在紅館舞台的告別感覺？不知道，只知的是全場放低筷子，鴉雀無聲靜心欣賞。龐大的侍應隊伍們也站在宴會場邊垂手而立聽歌。
一曲既罷，Leslie也準備回座位，大家即報以熱烈掌聲及Encore，小田連忙喊住他：「喂！叫佢(指Leslie)唱英文歌啦，佢鍾意唱英文歌！」卒之，Leslie又繼續在台上沉醉在自己的音樂世界中，獻唱了《Memories》。
| 好啦！以為完啦！點知仲有下文——事關Leslie返回座位時，Encore聲實在大大，司儀又做醜人替大家央求他唱多首，在擾攘一番之後，阿B便被拉上台和Leslie合唱了《沉默是金》的搞笑版。然而阿B不熟台詞，Leslie便在他耳邊提水，可惜Leslie實在也久未唱過這首歌了，唱了一半連他也忘了歌詞，結果就是他倆在台上「DaDaDa，啦啦啦」地，又攬頭攬頸又大笑地唱完此曲。 |  |
 |
落到台下，還說：「呢度咁多唱家班，有鄭嘉穎(手指指)，等佢地唱啦！黃百鳴我也知道你想上台唱歌好耐㗎啦！」
敬酒時，Leslie又說：「多謝黃百鳴每年都塞咁多錢俾我使。」
以高價聘得榮哥哥拍戲，當然值得，觀眾有眼福之餘，大家又有機會 (記住只是機會) 欣賞千金難買的Leslie迷你演唱會。 |
香港報章
LeslieCheungCyberworld © 2024 , All Rights Reserved