如果張國榮（哥哥）不曾離世，今年將是他踏上演藝星途的第30個年頭，可今天卻成了他逝世四周年的日子。一班長情的哥迷猶如往年般為他舉辦多項紀念活動，哥迷會 Red Mission更將活動統稱為「為您鍾情 30年」。哥哥的骨灰安放在加多利山的故居，他的親人朋友，依慣例都會在今天在那裡相聚，但他們刻意保持低調，希望大家將哀愁放開。

記得哥哥在89年告別樂壇演唱會上對歌迷說：「我唔係一個貪心嘅人……如果有朋友問起你哋80年代香港歌星裡面有邊幾個，你哋係咁意提吓我就夠。」這天，哥迷們、哥哥生前的合作夥伴及好友們談及這位經典偶像，舉辦紀念活動，都並非是為了提起一件傷心事，而是大家一同為張國榮——這位光芒不滅的一代巨星曾經存在過而感到高興。

毛毛16歲時與哥哥拍拖，不說不知，原來二人都愛唱粵曲，毛毛說：「我哋試過上去啲學會度，有晒大鑼大鼓錄晒音咁，呢段時間應該喺我結婚前嘅，我仲有 keep住呢啲歌，間中拎出嚟聽吓，不過我唔會畀其他人聽。佢走之前同我講過話畀咗啲朋友聽，個個都估唔到我哋唱得咁好。我哋最鍾意唱任白嘅歌，哥哥做任劍輝，我就做白雪仙。」

莫文蔚：當哥哥Uncle

莫文蔚（Karen）叫哥哥做uncle，因為她小時候曾在哥哥參加歌唱比賽時獻花給他，Karen說：「我到o衣家都周不時會諗起佢，有時仲會夢見佢，我會記住哥哥開心嘅嘢，將呢啲好嘅回憶放喺心中，唔會忘記。」Karen謂最難忘與哥哥合拍《色情男女》時，哥哥對她百般照顧，以及她任哥哥演唱會嘉賓，她說：「嗰次係我第一次踏上紅館舞台，同佢合唱《只怕不再遇上》，每次唱完歌佢都咀我一啖，足足咀咗20幾場，連美加巡迴都帶埋我去，真係一生難忘。」

舒淇：靠MV回憶 

舒淇與哥哥合拍《色情男女》時認識，她說：「我嗰時廣東話唔係咁好，佢就好似一個好親切嘅哥哥一樣教我點做戲，佢對我好好，好照顧我㗎。」舒淇與大部份懷念哥哥的人一樣，每逢看到他生前的歌影作品，就會想起其生平點滴，舒淇說：「有時睇番佢啲MV，真係覺得好可惜，一個咁正嘅藝人咁快離開我哋，如果哥哥仲喺度，我最想可以再好好同佢合作拍一部戲，同佢合作永遠都會有新嘅嘢學習。」

林嘉欣：佢喺我側邊 

哥哥最後一部電影《異度空間》就是和林嘉欣合作，嘉欣無法忘記這位超級巨星對新人的親切，偶爾會搭她肩膊叫她「妹妹仔」，教她做戲，嘉欣說：「唔使刻意諗，我都會經常記起哥哥，我經常都覺得佢喺我側邊。我覺得佢真係一個 Legend（傳奇），佢拍嘅《霸王別姬》最經典，真係好好睇。無論劇本係咪好出色，或者只係一個好普通嘅劇本，只要有哥哥喺度，整件事都會提升咗，好睇好多。無論哥哥去到邊，都希望佢永遠快樂。」

雖然譚詠麟與哥哥於80年代是競爭對手，其實惡鬥只存在於歌迷之間，二人在99年打破隔膜合唱，譚詠麟說：「好多時電視播番佢做嘅電影，我都會諗番起以前嘅事，最記得1986年我同佢一齊出席東京音樂節，到達現場時我哋同時間落車，兩個互相對望咗一陣間，我哋竟然著住同一個款，同一隻牌子嘅粉紅色西裝，本來就尷尬死，不過哥哥轉數好快，佢同我講話我哋可以同人講話呢套係香港隊制服，我哋係香港代表，諗返都覺得幾搞笑。」

黃耀明：全面嘅藝人 

黃耀明與哥哥都被稱作天生的藝術家，二人同聲同氣，十分投緣，在哥哥人生的尾段時間，二人曾合作推出唱片，明哥說：「同哥哥合作係我歌唱生涯中最難忘嘅經驗，我個人唔會回望過去，但有時喺收音機聽到播哥哥啲歌時，都會諗起同佢合作時候嘅點滴，佢係一位好全面嘅藝人，無論舞台、演戲、歌唱都係，呢啲巨星o衣家已經越嚟越少。」