Leslie Cheung Cyberworld

張國榮透露梅艷芳心事

每一個接觸過「東山復出」後的張國榮的人，都話：「佢變咗！」張國榮與以前最大的不同是：成個人都輕鬆、舒服咗，完全無壓力。看上去近乎是異常的開心和心滿意足。

張國榮現在很隨和，與人總是有講有笑，非常平易近人。與兩年以前的高不可攀，真是判若二人。

「唔係嘅」賴斯里話：「我以前冇話高不可攀，係身邊嘅人整到我好似不可親近啫。」

「係呀。」我話：「記得有一次，你同一班人去吃日本菜，黎小田訂了兩間房，賴斯里坐在那一邊大門，封住，不准任何人從那邊出入。」

「係囉。」張國榮話：「其實我唔知，那時你哋訪問我，要安排，時間又好緊密，有時未傾完又趕住催住，一啲都唔關我事。」我問：「一年搵咁多，又捨得放棄嘅？」

「係呀，我做生意嘅朋友，好似楊受成就話：咁多錢搵你都唔要……」

「係囉，點解呀？」

「五年前，有一次我與阿梅在馬來西亞登台。兩個人講起，我話，我再唱三年就收山……收山唔係臨時決定，五年前我就決定了，當時阿梅話：我遲多兩年，比你遲兩年我都退出。其實，我唔贊成阿梅退出。」

「點解呢？」

「佢仲可以做，佢重有機會。我呢，我覺得自己已經去到頂，再行，就係下坡咯。」張國榮話：「主要係唔衰得，唔想見到自己跌低了，至來退出。我覺得到了頂峰，退出最好。唔唱歌，我重有戲，阿梅唔唱歌，就無啦。何況五年前，佢講嘅嘢，淨係我知，佢可以當自己無講唔使履行諾言，我又唔會講出去。」

「你覺得拍電影無壓力咩？」

「電影的成敗係大家的事，唔係我一個人。我唔鍾意同人爭，我地啲歌星無爭，第啲人都會搞到我地好似係度爭，我唔鍾意。」張國榮話：「依家幾好呀，我同阿倫得閒一齊打吓波。佢來加拿大又會來找我，我喜歡我依家同人哋嘅關係。」

在《家有囍事》的拍戲現場，我前前後後見過賴斯里四次，依家佢真係完全無同人爭，即使是周星馳的八百萬，乜乜物物都好啦，佢得個聽字，間中講吓笑表示羡慕，任何時候，總是一副人到無求品自高的樣子。不過佢話：「一年後我會做導演，唱歌是永不會唱啦。」講起不唱歌，他是那樣的義無反顧。