1997
星仔捧場哥哥乘機玩大佢
1997-01-05
周星馳與莫文蔚的緋聞，愈睇愈呼之欲出，前晚本報記者接獲線報，星仔靜雞雞去了紅館後台探望這位傳聞中的女友，但當記者抵達時，星仔已悄悄地溜了，而文蔚收到風有記者在場館門外等候，竟蠱惑地使出調虎離山計，利用她的保母車分散記者注意力，卻靜雞雞地由其他秘密通道離開。
星仔到後台探完莫文蔚後，便坐在台下的觀眾席上睇完莫文蔚演出才匆匆離開。其中有兩幕演出，張國榮咀莫文蔚，及哥哥揭開文蔚的衫裙。
哥哥見到星仔在台下，抵死地特登以位相就，詐作咀俾星仔睇，仲「潤」星仔：「嗱，我哋晚晚都係咁樣咀架。」全場觀眾為之哈哈大笑。到哥哥揭開文蔚的衫裙時，哥哥則風騷地叫文蔚坐低，並對看台下的星仔「懶」得戚地說：「嗱，你依家睇下我點樣搞你條女！」哥哥講就講得威風，但哥哥好有義氣嘅，他不單止無揭開文蔚件衫，還幫文蔚拉番好件衫添，梗係啦，朋友「妻」不可搞嘛！
昨日記者分別聯絡星仔及文蔚，但聯絡不上文蔚，而星仔則在電話中否認探莫文蔚班。 他說：「唔係呀，我係去睇張國榮演唱會之嘛。」他又否認有去後台探文蔚，他說：「我都有去後台。有無睇晒個騷？無喎，點解唔睇晒先至走？差唔多啦！個騷好唔好睇？好好睇。莫文蔚做成點？唔錯吖！舒淇又做成點？嘩，簡直好野添呀，不過表演得最好那個都係哥哥。」
東方日報
LeslieCheungCyberworld © 2024 , All Rights Reserved