Leslie Cheung Cyberworld

要青春常駐唔一定日日食燕窩

張國榮躲在家裡最喜歡……

你地估天皇巨星張國榮平日在家做什麼？一個大男人做什麼好呢？聽歌？睇電視？掃地？抹塵？

通通都不是！而是親自下廚煮番幾味撚手小菜，而且他還有一個小小秘密的嗜好，就是喜歡收集膠盒，這些膠盒是他要指定到一間有專利權的日本公司才買到，每次他都會自己親自去挑選，雖然只是一個小小膠盒，不過他仍然親力親為。

「我屋企整理得井井有條，係我訓練工人要每日打理屋企，尤其個廚房一定要夠乾淨，我的膠盒好有用，因為要分門別類分別放冬菇、海味、瑤柱粒等等，放得好整齊，放好之後就再話俾工人知，因為佢地用完要放回原位，第二時到我用就知道放在那裡。」

當他心情好時便會下廚，他覺得吃是一種享受，所以他最喜歡煮小菜。正是民以食為先，有很多人都覺得張國榮靚樣十年如一日，他的皮膚又靚又滑，一點也下似近四十歲的男人，相信他一定吃好多補品。

「有無日日食燉燕窩？」「以前有食燕窩，但而家無食，我改了食維他命丸，因為睇過書同醫生專業意見，食燕窩係好有益，不過就見效慢，要日日食一段好長時間先有用，但係維他命丸就唔同，即刻見效。」

現在他已成為維他命丸的支持者，男人唔補一樣好易老，而家揭開榮哥駐顏有術之謎，原來是靠維他命丸，除了細細粒容易食的維他命丸，生果亦是對養顏有功，所以在榮哥身邊幾時都有生果相陪，正是飯後一蘋果醫生遠離我，飯後一個橙唔會做煙剷！

「食多啲生果對腸胃有幫助，因為一旦開工就只有捱飯盒，幾有錢都無用，以前對於食我好少揀飲擇食，不過近年就減少食肉，不過一樣會食雞肉，有時會食素。」本來食素亦一樣好，但他因心理作用怕會體力不足，不過他不會因此而做食肉獸。榮哥自言一向十分注意身體健康，不過是煙民的他暫時仍未談得上是健康。

「十二月中要開演唱會，所以七月開始準備戒煙，其實我以前戒過一段日子，但係戒咗之後就會肥，為了上鏡好看些，就再食番煙，平日我都有做運動，精神幾好，不過戒煙又驚再肥。」榮哥肥也不怕，因為始終是靚仔一名，他在家中吩咐工人打理家務頭頭是道，儼如管家婆，而且又能下廚，未知他的好朋友唐先生可曾有品嘗過呢？