1996

張國榮醫足一年頭髮不再稀疏

文：林冰

昨日，《上海灘》開鏡拜神，「永盛娛樂」擠滿了人，真是難得一見的大場面。

張國榮入嚟時，我叫住佢，佢竟然鬍鬚邋達，對我話：「你最唔鍾意我呢個樣嘅啦，我又留鬚啦。」

「許文強之造型？」「係兩個造型之一，呢個係潦倒時嘅造型。」

「辣士里，我發覺你樣子有少許變咗啫。」「係呀，頭髮密咗，睇咗一年醫生，你估邊個介紹我睇呢個醫生架？鄭君略呀。」

「開心啦，你呢世人最大的遺憾係前額頭髮漸稀。o依加好咯，梳頭都易好多。」

「係呀，你知我生得個咁後生嘅樣，如果頭髮稀薄，好唔抵嘛，打算再吃半年藥。你好嗎？好似都清減咗喎？」辣士里話：「一陣完咗你唔好走，我同你傾吓偈。」

大家喺度輪住排隊訪問辣士里，太多人啦，我諗住揾佢，同佢契仔母子吃飯再傾過。既然佢要我留低，我便留下來等佢同佢傾。

再回到辣里見身邊，佢話：「喂！我接咗小寶部戲，你又咁鍾意小寶，到時實多啲來探班嘅啦。」「係呀。」

「陳可辛又揾我拍《金枝玉葉》續集，我無應承佢。我都唔鍾意拍續集嘅。」「唔叫續集可以叫第二啲嘅啫，至緊要哥哥你肯接。」我打趣。「我呀，聖誕我開演唱會，七月開始操嘅嘞，今年最多拍埋小寶嗰部。」

「首次復出，打算開幾多場呀？」「二十五場，想多都無，前面有人訂咗（指紅館），後邊就係各大傳媒頒獎禮，或者我開二十場好咯，到時我請你睇。明年，明年我預咗走埠，到世界各地去巡迴演出。」「啱嘅，分數多並非代表成功。至緊要做得好，辣士里呀，九五年唱片銷量，你係前五名，其實即係第幾啫？」「其實係第一。以單一張唱片來計，我係第一。港台等頒獎禮都講到明，係我唔領獎至唔頒俾我。有啲人出三張碟，三張加埋總數贏，話第一會有啲混淆。」

「辣士里呀，頭先佢哋問你，話做許文強，有無壓力？因有周潤發珠玉在前……你答話無壓力，係驚周潤發有壓力啫…」

「唔係咁講點講啫？我夠想問吓佢地，佢地個個都話周潤發做得好，我想問邊場同邊場做得好？無人講得出。」

「當年嘅發仔，係神韻、神采都好，當時佢風華正茂，神釆飛揚。」

「我最近係荷里活見到發仔，佢好好，恢復晒舊日嘅神采，又瘦晒。可以喺呢度發展，真不容易，你知要靠英文嘅啦，正如有許多人諗唔到我啲國語咁好（指《霸王別姬》）」。

「有無見你契仔阿正呀？」

「上次同你一齊見，到o依加無見啦。佢一日一日大，唔開工時可以帶佢出來吃雪糕，大個仔拖住有啲尷尬，通吓電話，關懷吓就有，都好耐無見嘞。」

辣士里話：「我在香港過年，你得閒打電話俾我。」佢俾低個電話我。我問：「新屋裝修好未？幾時搬？」

「快啦，過年可以搬嘅啦。」辣士里歸隱後復出，歌影皆春風得意。

明報