1996
張國榮冧死鬼佬奪影帝呼聲高
舒琪在為《旺角揸Fit人》負責宣傳活動有電話打來，舒琪面容凝重，未幾，說「如果屬實，哥哥真的行運行到腳趾尾！」
原來《風月》赴康城參加「比賽」，那邊打長途電話來叫做「預先報捷」吧，說張國榮甚受鬼佬關注，形勢一片大好，「最佳男主角」呼聲之高，據民意調查顯示，應只有一個《三生一死》的馬斯杜安尼可跟他競賽。
何時可知答案？「二十號」舒琪說。
拍俾外國人睇
其實舒琪對《風月》一直只看好導演，他說：「我認為陳凱歌有機會拿『最佳導演』或者『技術』獎，或者，影評人可能俾獎佢」。
但「最佳影片」和「最佳男女主角」，他則都不看好。「當然我亦未睇過其他影片，唔可以妄下斷語。」
香港影評人對《風月》普遍反應不是太好，但最明顯的，是認為陳凱歌「拍俾外國人睇」和「拍外國人鍾意的題材」，對此，舒琪說：「我唔係幫佢講說話，但係陳凱歌拍戲，當然唔係拍俾香港人睇架！既然唔係拍俾香港人睇，又唔係拍俾中國人睇，中國都禁咗佢，所以肯定係拍俾外國人睇嘅啦！至於『拍外國人鍾意的題材』，你想想，在中國，莫非還拍文革？拍現代，唔係佢拿手，亦都唔會好睇，拍二十年代上海，我覺得佢拍得好好，仲好過張藝謀(《搖啊搖，搖到外婆橋》亦屬同一年代上海背景)，作為導演，佢嘅成績無疑係幾好。」
人情分都高些
《風月》不是沒有瑕疵，但舒琪認為，很多影評都沒有真正指出缺點所在，偏偏用了「拍俾外國人睇」之類的理由去批評，他覺得對陳凱歌的導演工作來說，評價是不公平的。
至於哥哥張國榮的「最佳男主角」呼聲甚高，舒琪坦承：「如果佢得獎，佢真係行運！」他認為他的表現並不突出，但：「馬斯杜安尼咁老資格，兩個人比較－－老嗰個……」人情分都高點是真。
星島晚報
LeslieCheungCyberworld © 2024 , All Rights Reserved