Leslie Cheung Cyberworld

1996

張國榮大跳同性辣身舞熱力爆棚

1996-12-13

士別七年，張國榮重踏舞台，舉行廿二場《張國榮跨越九七演唱會》，前晚終於展開了首場演出，哥哥的確不負眾望，令人刮目相看。前額頭髮染成金色，搽了銀色脣膏、白色指甲油的哥哥，形象已經令人耳目一新，但，至激的還是哥哥一時做男人，一時做女人的精采演出，簡直睇到全場觀眾嘩然大叫，拍案叫絕。

男人的哥哥：哥哥在台上盡展男人味，不只露點，更用手摸下體，甚至將手伸入短褲中，動作極之大膽;但至激的，還是哥哥和艷星舒淇的演出，穿T字底褲，低胸又露股的舒淇，和哥哥合演一場火辣辣舞蹈，哥哥坐在椅上，舒淇則擘開大髀跨坐在哥哥重要部位上，誘惑大膽，哥哥仲好抵死話：「唔好再咁壓住我，有些少反應。」全場失笑。

紅色高跟鞋惹火

女人的哥哥：《紅》MTV已經好大膽，但與哥哥在舞台上演繹這首歌的舞蹈相比，真係小巫見大巫，哥哥居然穿了一對三吋紅色高跟鞋，與男舞蹈員大跳貼身舞，摸胸又摸大髀，仲要身貼身，睇到觀眾嘩嘩聲，連哥哥媽咪都伸長頸睇到眼都唔眨，哥哥之後仲好風騷話：「台上做騷有呢個好處，可以一時做男人，一時做女人，頭先全情投入做女人，相信觀眾唔介意我係男定女，做男人可以好有型，女人可以好靚女。」

在祝捷會上，大家都話「紅」呢Part好大膽，哥哥不在乎話：「唔緊要，張國榮係浮游物體，無形象，做騷梗係要咁，要有Talking Point，鍾意覺得好睇嘅就當係藝術，唔好睇嘅就話猥瑣，無界限嘅。」原來呢Part舞係哥哥自度，但都話最鍾意「紅」，覺得好激好大膽。

觀眾睇到唔肯走

哥哥復出首場個唱，觀眾睇到唔肯走，但哥哥就堅持無安哥，他解釋：「一早講咗無安哥，唔想有欺騙成分，我覺得俾足晒好嘢觀眾睇就夠，可能我咁做完之後會變做潮流，以後嘅演唱會都無安哥。」

1996

張國榮大跳同性辣身舞熱力爆棚

東方日報