Leslie Cheung Cyberworld

傳與王家衛再合作哥哥：係咩？拍《6042》呀？

當年哥哥張國榮拍完王家衛嘅《阿飛正傳》，即刻榮升金像獎影帝。最近有傳聞指他將會再同王家衛合作，昨日哥哥話佢都想再同王家衛合作，不過就否認傳聞，仲嫌王家衛拍戲冇劇本，即使真係開戲搵佢都要諗清楚。

昨日哥哥出席新片《Double Tap》記者會時，心情大靚兼且非常風騷。當被問到同王家衛再合作嘅傳聞時，哥哥笑笑口話：「係咩？邊套呀？係咪《6042》呀？如果佢搵我拍戲，我開心到飛起。不過佢拍戲成日都冇劇本，有好劇本嘅話我都會拍。」

新片演冷血殺手

哥哥亦接拍爾冬陞的新片，今次哥哥將會飾演一名冷血殺手，有唔少動作場面，仲要跟專人學用真槍，哥哥好開心話：「個古仔好正，我又從未做過變態殺手，通常香港人以為做反派就即係做配角，但係今次我呢個反派亦係主角。」

點名讚黃卓玲

哥哥更大讚戲中飾演佢女友嘅黃卓玲：「通常新人同我拍對手戲，尤其是初時唔熟會怯場，但係佢一埋位就好放好投入，值得點名讚吓佢。」

稍後哥哥會接拍陳果嘅新片，同李燦森合作拍喜劇。不過講到佢自己第一次做導演嘅新戲，哥哥話最快都要明年先才會開拍。