1997

個唱被評為不雅 張國榮慨嘆：唉，井底蛙！

 1977-01-24

最近，有議員建議把演唱會劃分三級制，主要針對張國榮演唱會內容不雅過火，此言一出卻惹來歌手及製作人的反對、抨擊。

被「擺上枱」的男主角張國榮對此不慍不怒，只是低聲反問：「我個演唱會何來有不雅、三級！唉，井底蛙！」當聽到批評其個唱的是議員，哥哥即提議記者問問廣播處長張敏儀，張敏儀對其個唱讚到不得了。「可能有人想搏出位啦！但有無睇過我演唱會都成問題，問下鄭經翰囉！」(之前他曾在電台指責哥哥個唱內容不雅，教壞細路。)然而，哥哥未有為此嬲怒，「呢啲嘢係見仁見智嘅！有啲人又保守啲嘅！十年前麥當娜、米高積遜已經做過，唔係踩高踭鞋就話三級！」總之，哥哥自問在今次演唱會交待得有餘。有謂其演唱會舉行至今仍備受談論可算「成功」？哥哥聞言即笑咪咪答：「我梗係話成功架，其實，鍾意我個演唱會的佔大部分，只係有啲人搞小姿態、小動作啫！語不驚人誓不休嘛！不過，把口生係人度，佢哋鍾意點講咪點講！」

赴日演唱機場遇張曼玉

哥哥更幽默道各個巡迴演唱會站站爆滿，反而要多謝他們咁講幫助宣傳呢！「但係第二度」啲人聽到咁講以為個演唱會好咸濕，可能就會失望而回。」問到其最受人爭議的「自摸」動作可會在巡迴演唱會中出現？哥哥隨即笑謂：「繼續摸，對唔住！」事實上，他覺得此僅是舞台上的一個表演，相比麥當娜，米高積遜演唱會只是小兒科，不可說教壞細路，「又無話叫細路仔來睇，我亦唔係爆粗，無所謂啦！」

昨日哥哥起程往日本，在東京舉行三場演唱會，碰巧滾石安排嘉賓梅艷芳及香港記者赴台灣參與草蜢簽約滾石儀式，本來哥哥準備見一見阿梅，惜阿梅到了餐廳吃東西以至緣慳一面。不過，哥哥另一個老友張曼玉竟又出現機場，原來瑪姬送朋友機見到哥哥便趨前喧寒，順道也送哥哥一程。

是次乃哥哥首次在日本正式舉行演唱會，但反應出奇地好，當地主辦商要求添食，唯於完成日本演唱會後哥哥需繼續新加坡等各地巡迴演唱，故現決定尾站再重返日本，暫定加開五至七場。有稱香港歌手在日本連開近十場演唱會甚是難得？哥哥便得得戚戚的笑道：「因為我紅嘛……。」  

東方日報