1988

張國榮星洲登台收獲 痴心歌迷給他空前滿足

張國榮在新加坡登台，令他享受到前所未有的讚美。

「好多人讚你靚仔，唱歌唱得最好咩？」「仲好過呢兩樣，就係個邊嘅歌迷，對我唱過嘅歌，可以一字不漏咁照唱。」

在新加坡演唱，張國榮自然不會漏唱那一首作為他心曲的《有誰共鳴》了。「台下邊嘅歌迷，可以跟住唱晒成首歌，咁我咪揸住個咪走落台，遞埋去俾個歌迷唱，大家玩吓，點知個位歌迷可以唱晒成首歌，真好嘢。」最令張國榮感到溫馨的濃厚熱情，就是大夥歌迷竟對這首歌那般情有獨鍾，居然一次，又一次，再一次，如是者唱七八次始肯停下來。

「當晚個騷唱完，我都鞠完躬入番後台，但跟住有工作人員叫我再出台，因為班歌迷唔肯走，要我出台至掂。」

香港開演唱會，一旦散場，場館內大燈、小燈，甚麼燈也通通大放光明的趕客，這一點星洲那方面也照做，可是，新加坡歌迷抱的態度是「話之你」，燈光下仍照坐，照拍掌，照叫「安哥」，如火熱情令張國榮在相當疲勞下，也禁不住再為他們多唱四五首歌，且唱得十分之開心。

「照咁反應，你可以再打鐵趁熱，去多一次啦！」「係呀，本來八月八號去，新加坡方面叫我去參加佢地國慶日的群星大匯演，做特別嘉賓；不過，我答應了在這一日，為商台的八小時慈善義演演出，只有推了新加坡囉。」  

八月八日的義演，是商台安排數十位歌星為中國的大興安嶺連綿大火，為災民義演的大騷，雖然張國榮是香港人，因有中國人血統，能為自己同胞出一分力，自是義不容辭。

「撇開所有問題唔講，做善事，係所有人都應該做的事，我參加入去出一分力，只係做番本份咁啫。」

「係啦，聽聞你位經理人，同你澄清響本月十一號的演唱會籌款嘅事喎？到底有乜唔妥，攪到要澄清呀？」

「我都仲矇查查，據我知，那日我淨係俾經理人接咗去管弦樂團做剪綵嘉賓，但唔知點解，出咗一張我同阿梅的海報，話我兩個人做演唱嘉賓，咁唔同一回事嗎， 我嘅經理人自然唔想買咗飛嘅人，以為我同阿梅甩底啦，咪事先聲明，話明我去剪綵，唔係唱咁之馬，無乜唔妥。」

此也事實，畢竟人家行善，是本著一片心去做，但行善如給人愚弄似的，那就不好。「我知我如果去呢，淨係剪綵，一定唔唱歌，聽講呢個演唱會都因怕撞雨水天而宣佈改期，咁都好，費事大家誤會太多啦。」

香港報章