1994

張國榮問：八十年代邊個最似我

文：林冰

走入東方錄音室，便見到張國榮、高志森坐喺張收音枱前，二人有講有笑。見到我入來，高志森指住一張櫈：「冰姐，你坐嗰度。」張國榮說：「都好，佢做我契媽。」

我一屁股坐係張櫈處，高志森見我那樣老實不客氣，就問：「你真係想出鏡呀？」我這才看到，他們前面擺著一部攝影機，由編劇晉身導演行列的馬偉豪正在拍戲，難怪辣士里話可以坐果度做佢契媽。這一日，拍的是《香蕉成熟時續集》，張國榮和高志森是來客串的。

無奈何自動請纓

我問張國榮：「你都會來客串嘅？自動請纓呀？」   「我點會自動請纓呀？」張國榮毫無熱情的說，與平時見到我，熱情得很的樣子大異其趣。   「你咁大個天王巨星，邊個咁好膽叫你來客串呀？」   「我喺呢部戲中飾八十年代的張國榮。飾張國榮有邊個似得過我呀。辣士里說：「咁我咪來客串一日囉。」   拍完一個鏡頭，辣士里退出來休息，有一堆人圍上來，全部喺這組戲的工作人員，男男女女，老老嫩嫩，每一個人都要與辣士里合拍照片，照完又照，照完又照，簡直沒完沒了。

時光倒流九年半

我見張國榮很忙碌於與人合照，不是可以傾談的，就退出來去找高志森：「肥仔森，點解UFO呢部戲會叫著你同張國榮客串嘅？」

肥仔森話：「辣士里係做番佢自己，我做番我自己。九年半前，就係喺呢間東方錄音室，我就係坐番依加呢個位，張國榮坐佢依加坐緊呢個位，呢個叫小蘭嘅配音員亦係坐依加佢坐呢個位，當時我地配緊《聖誕快樂》，今日就係重複九年半前嘅情景。」

「小蘭配邊個？」「李麗珍」

老豆係有地位的

原來《香蕉成熟時續集》中，男主角的父親曾志偉是一個配音領班，小男星是張國榮迷，這一日跟了父親來看配音，當然也是為一睹張國榮的明星風釆而來。有一個鏡頭從張國榮的身後，拍張國榮把曾志偉的一支墨水筆放入褲袋，我企喺度觀賞，有啲唔明，趁未開機，走埋去問：「辣士里，點解要特寫你袋了曾志偉支筆？」

辣士里話：「支筆係男主角送俾爹地，我借用了之後唔覺意將它袋落袋，男主角望見整個過程拍男主角覺得自己個老豆在工作上好無地位。」

「哦！咁嘛。」「不過，志偉係有地位嘅，後尾一場拍但臥病在床，我去探佢。男主角發覺老豆係有地位的。」辣士里話。  

兩靚仔從未碰頭

既然記得《聖誕快樂》拍於九年半前——高志森當然也記得辣士里嗰時剛剛紅。「梗係記得啦，戲內有陳百強添。」高志森話。

「聽講那時兩個靚仔歌星唔多啱key，拍戲有鬧不快呀？」「我講你知嘛，佢地兩個從未碰過頭。」

「有對手戲？」「有，不過，我經常跳拍，明明要做對手，我就分前後一兩日來拍，拍張國榮正面時，搵第個替陳百強背影，拍陳百強時，張國榮背影亦搵人替，總之，從來無安排佢哋同場拍。」

「你嗰時得二十六歲，已經咁醒目。」我打趣：「唔怪得呢十年你發成咁啦。」，這一日高志森常常指點這，指點那的，辣士里提醒佢「喂！你今日做演員，唔係導演呀。」

李志毅係清道夫

《香蕉成熟時續集》係李志毅監製。

「阿志，又係你監製呀，UFO部部都你監製嘅？」「唔係，我監製兩部之嘛，張之亮的《等著你回來》同呢部《香蕉成熟時續集》之嘛」 曾志偉話：「你唔知咩，李志毅係我地UFO嘅清道夫」

「乜你地UFO好多垃圾呀？」 志偉話：「哦！你唔睇波，唔知乜嘢叫清道夫，即係把守最後防線嘅球員。 」

「你呢，志偉，你係UFO乜嘢呀？ 」「我係軍醫，有傷殘就我出面搞掂，張之亮，陳可辛就係前邊衝鋒。」

這時瘦瘦小小的女製片走入來，志偉話：「呢個咁奀瘦嘅製片，派去埃塞俄比亞就啱。」真係一個最多口同刻薄嘅老闆。

我問高志森：「曾志偉做的配音領班，當日係邊個做呀？」「丁羽。」高志志森話：「當日重鬧了個笑話，配完呢場我問跟住第幾場？丁羽話，第四場未跑，我講配音，佢講跑馬，真搞笑。」

明報